Me no iʼohe khönia Nebukanesa ba Mbabilona zohalöwö ba Yehuda segebua faka, ituyu samösa zohalöwö ba gödo sotöi Asifena ba wamaigi-maigi yaʼira. Iʼandrö khö Asifena ba wamili iraono matua si lö fökhö ba sagatua-tua ba gotaluara. Lafahaʼö ndraono daʼö sagötö zi tölu fakhe enaʼö tobali ira sohalöwö sebua faka ba Mbabilona. Lafahaʼö ira ba wombaso, manura, ba fahuhuo ba li niha Mbabilona yaʼia daʼö li Akadi. Laʼa göi gö simane niʼa razo awö ndra sohalöwö khönia si so ba faka. So ba gotalua ndraono matua si bohou ebua andrö Danieli, Hanania, Mizaeli, ba Asaria. Ibeʼe döira Asifena moloʼö töi Mbabilona:  Belizasari, Saderakhi, Mezakhi ba Abedo-Nego. Hadia laböhöli dania wamosumange Yehowa?

Yaʼira si daöfa andre lö labato wamosumange Yehowa. Aboto ba dödöra wa tebai laʼa gö niʼa razo börö me so ösa gö si raʼiö si tebai laʼa moloʼö Oroisa Yehowa. Börö daʼö lamane khö Asifena, ’Maʼandrö tolo, böi waʼö khöma wemanga gö niʼa razo.’ Imane Asifena, ’Na lö miʼa, ba na iʼila mofökhö ami razo hasambalö ibunu ndraʼo!’

So aka nisöndra Danieli. Imane khö Asifena, ’Maʼandrö khöu, daʼö beʼe öma ba zi fulu hari sayu faoma idanö yaʼi. Aefa daʼö, faedogö ndraʼaga ba ndraono tanö böʼö si manga gö niʼa razo.’ Fao dödö Asifena.

Me no irugi fulu hari, Danieli hegöi awönia si datölu seha-seha manö ira moroi ba ndraono tanö böʼö. Omuso dödö Yehowa börö me laʼoʼö niwaʼönia. Ibeʼe nasa khö Danieli waʼatua-tua ba fangiʼila eluaha wangifi hegöi angilata.

Me no awai lafahaʼö fefu ndraono matua andrö, iʼohe ira Asifena khö Nebukanesa. Fahuhuo khöra razo, ba wamaiginia abölö onekhe ba abölö atua-tua Danieli, Anania, Mizaeli, ba Asaria moroi ba danö böʼö. Börö daʼö, ifili ndraono matua si daöfa andrö wohalöwö ba gödo. Asese iʼandrö khöra razo mene-mene na so gabula dödönia. Ibeʼe khöra waʼatua-tua Yehowa töra moroi khö ndra sagatua-tua ba sogonekhe fakelemu ba Mbabilona.

Hewaʼae ba soi tanö böʼö so Danieli, Anania, Mizaeli, ba Asaria, lö olifu ira wa ono mbanua Yehowa ira. Hadia itörö göi tödöu Yehowa hewaʼae na tenga ba zinga zatuamö so ndraʼugö?