Nébukadnézzar éí Júdah binantʼaʼí Bábilangóó ayííʼeezh. Áshpenaz joolyéego díí ashiiké bikʼi jidéezʼı̨́į doogo nihoʼdeeltı̨́. Áko ashiiké baa dadzólní índa ayóó nitsídaakeesii níjiizlááʼ. Naatʼáanii bá nidajilʼaʼ doo biniyé Kaldííya saadígíí bídahwiizhdoołʼááł hodóʼní. Saad dajółtaʼ, bee akʼedaʼjiłchí, dóó bee yádajiłtiʼ doo biniyé nidahoʼdineestą́ą́ʼ. Naatʼáanii bichʼiyąʼ dajiyą́ą doo hodóʼní. Ashiiké bízhiʼ éí Daniel, Hananáíyah, Mísheiyel, dóó Azaráíyah. Áshpenaz éí Bábilan kʼehjí házhiʼ há ádayiilaa: Daniel éí Bélteshazar, Hananáíyah éí Shéídrak, Mísheiyel éí Mííshak áádóó Azaráíyah éí Abédniigo. Daʼjííłtaʼígíí daatsʼí Jiihóvah dazhdósin yę́ę yitsʼá hodoonił?

 Ashiiké éí Jiihóvah tʼéí bikʼeh dahoniilʼı̨́į doo dazhnízin. Naatʼáanii bichʼiyąʼ baaʼihgo hoł béédahózin, áko doo dajiyą́ą da. Áshpenaz ádabijiní: ‘Tʼáá shǫǫdí, naatʼáanii bichʼiyąʼ tʼáadoo nihichʼįʼ kóníłʼíní.’ Áshpenaz áháłní: ‘ Doo daʼosą́ą́góó nihitah doo dah hwiináa dago naatʼáanii shidiyoołhééł.’

Daniel éí haa ádahalyánígíí ábijiní: ‘Chʼil chʼiyáán dóó tó tʼéí deidlą́ągo neeznáá yidoołkááł. Éí naatʼáanii bichʼiyąʼ deiyánígíí bił ałhąąh deidiidzįįłgo nihidínííłʼįįł.’ Tʼáá áko hodooʼniid.’

Neeznáá yiską́ągo ashiiké bitah yáʼádahootʼééh. Naatʼáanii bichʼiyąʼ deiyánę́ę bitah doo dah hwiináa da. Ashiiké bikʼeh dahóółʼįįdígíí Jiihóvah yaa bił hózhǫ́. Daniel éí hódzą́, naʼiigeeł dóó ił áhátʼı̨́ yikʼiʼdiyiitįįhgo áyiilaa.

Áshpenaz ashiiké Nébukadnézzar bichʼįʼ jiníʼeezh. Nébukadnézzar éí Daniel, Hananáíyah, Mísheiyel dóó Azaráíyah yichʼįʼ yáłtiʼgo, ląʼígóó bił éédahózin áádóó hadaʼasíidgo yaa ákoniizı̨́ı̨́ʼ. Áko bá nidajilʼaʼ doo biniyé náhodiinil. Nahatʼá daʼílíinii díí ashiiké nabízhdíłkid łeh. Hébukadnézzar bá nidahaʼáii dóó álílee ídaʼoołʼįįłii biláahdi ashiiké dahóyą́ągo nitsídaakeesgo Jiihóvah ábiilaa.

Náánáłaʼ kéyahdi nijikai ndi, Daniel, Hananáíyah, Mísheiyel dóó Azaráíyah éí Jiihóvah bidineʼé dajílı̨́įgi doo baa dajiyooznah da. Niísh ákótʼéego Jiihóvah tʼáá áłahjįʼ béénílniih doo?