Etyi Nambukondonosole atuala ovanthu vamwe vo ko Judaa koukonde mo Mbambilonia, atumu omutumini umue utiwa Aspenaz opo evelongese. Nambukondonosole apopila Aspenaz opo akoye-po ovakuendye vamwe vena ekongoko likahi nawa nokualunguka. Ovakuendye ovo ankho opala valongeswe momanima etatu. Ovipuka mavalongeswa mavivekuatesako moutumino wo Mbambilonia. Ovakuendye ovo ankho vena okulongeswa okutanga, nokuhoneka, nokupopia elaka litiwa Akadia ankho lipopiwa mo Mbambilonia. Tupu ankho vena okulia ovikulia vilia ohamba novanthu ovakuavo vakala mondyuo yohamba. Ovakuendye ovo vekuana umwe o Daniele na Hanania na Misaele na Asaria. Aspenaz eveluku omanyina omo Mbambilonia,  Beltesazar na Sadrake na Mesake na Abedeneku. Okuti elongeso olio lievehindila okuyeka-po okuumbila Jeova?

Ovakuendye ovo vekuana ankho vahanda okutavela ku Jeova. Ankho vetyii okuti kavapondola okulia ovikulia viohamba mokonda Ovitumino via Jeova vipopia okuti ovikulia vimwe viasila. Avaiti ku Aspenaz okuti: ‘Mbambavo uhetulingile ovikulia vio hamba.’ Aspenaz akumbulula okuti: ‘Inkha kamuli iya ohamba tyina imutala ngoti muavela, ohamba maindyipaa!’

Daniele asoko otyipuka tyimwe. Akapopia nomulume ankho uveyunga ati: ‘Mbambavo tuavele vala onombi nomaande mokueenda kuononthiki ekwi.’ Konyima otale inkha matulikalela novakuendye valia ovikulia viohamba.’ Omulume wo kuveyunga etavela.

Etyi palamba ononthiki ekwi, Daniele nomapanga ae ankho vanina vali tyipona ovakuendye aveho. Jeova ahambukwa unene mokonda vemutavela. Jeova alo umwe emuavela ounongo wokuhangununa onondyoi.

Etyi vamana okulongeswa, Aspenaz evetuala ku Nambukondonosole. Ohamba aipopi nawa tupu aimbuka okuti Daniele na Hanania na Misaele na Asaria valongoka nokualunguka vali ku vakuavo. Akoyo ovakuendye ovo vekuana vaundape mombala yae. Ohamba apeho tyina ankho itetulula ovitateka iveita vapopie-po. Jeova eveavela ounongo tyipona ovanthu aveho, ohamba ankho iyumba onthumbi.

Namphila Daniele na Hanania na Misaele na Asaria ankho vakala motyilongo tyihe tyavo, mahi kavalimbuile-ko okuti ovanthu va Jeova. Okuti noove apeho uhinangela Jeova, alo umwe tyina ovo tete yove vehe-po?