Nen inawit nen Nabucodonosor ed Babilonia iray prinsipe na Juda, ingganggan toy opisyal na palasyo ya si Aspenaz ya mangasikaso ed sikara. Imbaga nen Nabucodonosor ed si Aspenaz ya pilien to ray kabataan ya lalaki ya maong so laman da tan matatalino. Taloy taon ya ibangat irayan kabataan ta labay da ran gawaen ya atagey ya opisyal ed Babilonia. Kaukolan dan aralen so manbasa, mansulat, tan mansalita na Akkadian, say lenguahe na saray taga Babilonia. Kaukolan met ya say kanen da et pareho ed kakanen na ari tan saray opisyal to. Kaibad sikara so apatiran kabataan ya si Daniel, Hananias, Misael, tan Azarias. Inikdan ira nen Aspenaz na ngaran da ed Babilonia: Beltesazar, Sadrac, Mesac, tan Abednego. Mandayew  ni ra kasi ed si Jehova no nabangatan ira na saray taga Babilonia?

Si Jehova labat so labay ya unoren na sarayan apatiran kabataan. Amta ra ya agda nepeg ya kanen iray kakanen na ari, ta ibabaga na Ganggan nen Jehova ya say arum ed saratan et agmalinis. Kanian imbaga dad si Aspenaz: ‘Kerewen mi ya agyo kami papakanen na saray kakanen na ari.’ Imbaga nen Aspenaz ed sikara: ‘No agyo kanen so kakanen na ari insan to nanengneng ya aliwliway itsura yo, pateyen to ak!’

Walay naisip nen Daniel. Imbaga tod samay managserbi na naakan da: ‘Ikdan yo kami labat na pising tan danum ed samploran agew. Tan kayari to, ikompara yoy itsura mi ed arum ya kabataan ya mamangan na kakanen na ari.’ Pinmayag imay managserbi na naakan.

Kayari na samploran agew, mas maong so itsura tan laman nen Daniel tan say taloran kakaaro to nen say arum ya kabataan. Manliket si Jehova ta maunor irad sikato. Inikdan to ni ingen si Daniel na karunongan ya talosan iray pasingawey tan kugip.

Nen asumpal lay impanaral na saray kabataan, inawit ira nen Aspenaz ed si Nabucodonosor. Kinatongtong ira na ari tan anengneng to ya si Daniel, Hananias, Misael, tan Azarias et mas matalino tan aktibo nen saray arum ya kabataan. Pinili to ran apat pian magmaliw ya opisyal ed palasyo to. Lanang iran tetepetan na ari no walay importantin desisyonan to. Ginawa ira nen Jehova ya mas marunong nen say amin ya marunong ya lalaki tan saray magician na ari.

Anggano sananey ya bansa so kawalaan di Daniel, Hananias, Misael, tan Azarias, agda nilingwanan ya si Jehova so Dios da. Sika ey, lanang mo met kasin nanonotan si Jehova anggano agmo kaiba iray ateng mo?