Judächö respetashqa nunakunataqa Babiloniamanmi Nabucodonosorqa apakurqan, y precisaq carguyoq Aspenaz jutiyoq nunapa cargunmanmi churarqan. Nïkurmi mas sänu y mas yachaq kaq jövinkunata akranampaq mandarqan. Y Daniel, Hananïas, Misael y Azarïas jutiyoq jövinkunapis akrashqam yarquyarqan. Y Aspenazqa acadiu idiömachömi Beltsasar, Sadrac, Mesac y Abednëgu nishpa jutinkuna churapurqan. Reyqa munarqan Babiloniachö precisaq carguyoq kayänanrëkur llapan jövinkunata kima (kimsa) wata rurin alleq yachatsiyänantam. Tsëmi mandakurqan acadiu nishqan idiömata leyita, qellqëta y parlëta yachatsiyänampaq. Jina rey mikunqan mikïkunata qarayänampaqmi mandakurqan. Pensari, ¿Babiloniachö imëkata  yachakurtsuraq tsë jövinkunaqa Jehoväta qonqariyarqan?

Tsë chuskun jövinkunaqa Jehovätam wiyakuyarqan. Jehoväpa leyninta alleq reqirmi munayarqantsu rey mikunqan mikïkunata qarayänanta. Tsëmi Aspenazta kënö niyarqan: “Rogakuyaqmi, ama mälasqa mandayämëtsu rey mikunqankunata mikuyänäpaq”. Peru Aspenazqa kënömi nirqan: “Mana mikuyaptikiqa, qeshyanëkaqtanö rikëkuyäshurnikim reyqa wanuratsimanqa”.

Danielqa alleq pensarirmi kënö nirqan: “Rogakuyaqmi, verdürakunallata, gränu mikïkunallata y yakullata chunka junaqpa qarayämë. Nïkur rey mikunqanta mikoq kaqkunatawan igualatsiyämë”. Y Aspenazqa “mä ari” nirqanmi.

Y chunka junaqkuna pasariptinqa, wakin kaq jövinkunapitapis mas sänum Danielwan amïgunkunaqa kayarqan. Wiyakoq kayaptinmi Jehoväqa alläpa kushikurqan. Y visionkunata y suëñukunata entiendinampaqmi Jehoväqa Danielta yanaparqan.

Kima watapa alleq yacharatsirmi Aspenazqa llapan jövinkunata Nabucodonosorman aparqan. Y llapankunawan parlarirmi reyqa cuentata qokurirqan Daniel, Hananïas, Misael y Azarïasqa llapampita mas yachaq kayanqanta. Tsëmi pëkunata akrarqan pëpaq trabajayänampaq. Tsëpita patsëqa, precisaq asuntukunachö yanapayänampaqmi reyqa pëkunata imëpis tapukoq. Jehovä yanapaptinmi pëkunaqa wakin yachaq nunakunapita y magia ruraqkunapitapis mas yachaq kayarqan.

Karu markachö këkarpis Daniel, Hananïas, Misael y Azarïasqa manam qonqariyarqantsu Jehoväpa markampita kayanqanta. ¿Y qamqa? Teytëkikunawan mana këkarpis, ¿Jehoväta wiyakunkitsuraq?