Kamachiq Nabucodonosormi Juda nacionpi kamachiqkunapa castankunata Babiloniaman aparurqa, hinaspam serviqninkunapa jefen Aspenazpa makinman churaykurqa. Chaymantapas, allin yuyayniyuq sano mozochakunata akllananpaqmi kamachirqa. Chay mozochakunatam kimsa wata yachachinanku karqa Babiloniapi allin riqsisqa kanankupaq, hinaspapas leeyta, qillqayta hinaspa acadeo rimaytam yachananku karqa. Mikunankutaqmi karqa kamachiq Nabucodonosorpa mikunantapas. Chay mozochakunatam Babiloniapi kaq sutikunawan Aspenaz suticharurqa: Danieltam Beltsasarwan, Ananiastam Sadracwan, Misaeltam Mesacwan, Azariastañataqmi Abed-negowan.

 Chay tawa mozochakunaqa Jehova Diosllatam kasukurqaku, chaymi mana mikunanku kaqtaqa mana mikurqakuchu. Aspenaztam nirqaku: “Ama hikutawaykuchu kamachiqpa mikunanta mikunaykupaqqa”, nispa. Aspenazñataqmi nirqa: “Allinta mana mikuptikichikqa unquqta hina Nabucodonosor qawaykususpaykichikmi wañurachiwanqa”, nispa.

Danielmi mikuchiqninkuta allin yuyaywan nirqa: “Ama hina kaspayá verduratawan yakullata 10 punchaw quwayku. Hinaspañayá kamachiqpa mikunanta mikuqkunawan ñuqaykuta tupachiwayku”, nispa. Mikuyta quqninkuqa “arí” nirqam.

10 punchawmantam Danielwan amistadninkunaqa wakinkunamantapas sanoy-sanoy qawakurqa. Kasukusqankuwanmi Diosqa anchata kusikurqa. Danielqa Diospa yanapakuyninwanmi musquykunapa ima ninan kasqantapas allinta yacharqa.

Kimsa watamantam mozochakunataqa Nabucodonosormanña Aspenazqa pusarqa. Nabucodonosorqa musyarurqam chay mozochakuna wakinkunamantapas yachaysapallaña kasqankuta. Chaymi serviqninkuna kananpaq akllarurqa, akllarqataqmi imapipas allinta tanteaysinanpaq. Jehova Diosqa aswanraqmi yachayta quykurqa, chaymi yachaysapakunamantawan layqa runakunamantapas aswan yachaysaparaq karqaku.

Daniel, Hananias, Misael hinaspa Azariasqa huk law nacionpi kaspankupas manam Jehova Diostaqa qunqarqakuchu. Qampas tayta-mamaykiwan mana kaspaykipas Jehova Diostaqa manam qunqanaykichu.