Nabucodonosormi Judá nacionmanta umalliqkunata Aspenaz oficialpa makinpi churaran. Jinan reyqa niran: “Chay umallikunamanta allin yuyaniyoq waynakunata ajllay, paykunan noqaq mijusqay mijunata mijunqaku, jinaspa Babiloniapi rimakusqan simita yachanqaku, kinsa watataq allin educacionta chaskinqaku Babiloniapi umalliqkuna kanankupaq”, nispa. Chay waynakunamanta wakinmi karan Daniel, Hananías, Misael, Azarías ima. Aspenazmi ichaqa Beltsasar, Sadrac, Mesac, Abednego sutikunata churaran. ¿Chay educacionta chaskisqanku t’aqanmanchu karan Jehová Diosmanta?

Chay waynakunaqa Jehová Diostan kasukuyta munaranku, yacharankun Babilonia reypa mijusqan wakin mijunakunaqa Diospa  jark’asqan kasqanta. Chaymi Aspenazta niranku: “Ama qowaykuchu reypa mijusqan mijunata”, nispa. Aspenaztaq niran: “Sichus mana qosaykichischu chayqa, reymi onqosqa uyayoqta rikusunkichis, jinan wañuchiwanqa”, nispa.

Chaymi Danielqa niran: “Chunka p’unchayta verdurakunata unullatawan mijusaqku, jinaspa chay qhepaman comparawayku reypa mijusqanta mijuq waynakunawan”, nispa. Jinan Aspenazqa “allinmi” niran.

Chunka p’unchay qhepamanmi chay waynakunaqa juj waynakunamanta aswan allin rikukuranku. Diosqa kusikuranmi kasukusqankumanta. Jinan Danielta yanaparan yachayniyoq kananpaq, rijuriykunata mosqoykunatapas entiendenanpaq.

Kinsa wata qhepamanmi Aspenazqa waynakunata reypa ñaupanman pusaran. Jinan Nabucodonosorqa repararan Daniel, Hananías, Misael, Azariaspas juj waynakunamanta aswan yachayniyoq kasqankuta. Chaymi Babilonia nacionta kamachiypi yanapakunankupaq ajllaran. Reymi sapa kutilla tapuq imatapas decidinanpaq. Jehová Diosmi yanaparan watuqkunamanta waj runakunamantapas aswan yachayniyoq kanankupaq.

Daniel, Hananías, Misael, Azariaspas manan llaqtankupichu kasharanku, chaywanpas kasukurankun Jehová Diosta. Qanri, ¿kasukunkichu Jehová Diosta tayta-mamaykiña ladoykipi mana kaqtinpas?