Nabucodonosorca Judá llactamanda ‘jatun mandajpa churicunatami’ Babiloniaman aparca. Chaipica jatun mandajta sirvij Aspenaz runatami paicunata cuidachun churarca. Shinallata paitaca nircami: “ali yuyaita charij” sano huambracunata apamungui nishpa. Chai jovengunaca Babiloniapi jatun mandajpa huasipi imatapash rurangapami quimsa huatacunata alipacha yachajuna carca. Chaipaca Babilonia llactapi parlashca acadio shimita liinata, escribinata, parlanatapashmi yachajuna carca. Shinallata jatun mandajpa huasipi rey micushca micunatallatami paicunapash micuna carca. Paicunaca Daniel, Hananías, Misael, Azarías shuticunami carca. Shinapash Aspenaz runaca Babiloniamanda gentecunapa shutita churashpami: Beltsasar, Sadrac, Mesac, Abednego nishpa rijsirca. ¿Chai llactapi alipacha yachajunaca paicunataca Jehová Diosmanda caruyachigrijurcachu?

 Cai chuscu jovengunaca Jehová Diosta tucuipi cazungapami munarca. Jehová Dios cushca Leypi huaquin micunacunata na micuchun mandashcataca alimi yacharca. Chaimandami jatun mandajpa huasipi carashca micunataca paicunaca na chasquina carca. Chai chuscu jovengunaca Aspenaz runataca cashnami nirca: Reypa micunata ‘micuchunga ama ñucanchitaca mandaichu’ nishpa. Shina nijpimi Aspenazca cashna nirca: Cangunata ‘irquilla ñavita ricushpaca, ñucatami jatun mandajca huañuchihuanga’ nishpa.

Danielca shuj ali yuyaita charimandami paicunata cuidajtaca nirca: Ñucanchimanga ‘micunatapash aicha illaj, yacutalla chunga punllacaman carashpa ricupai’. “Shina rurashca jipaca, jatun mandajpaj micunata micuj huambracunapaj ñavihuan, ñucanchi ñavihuan chimbapurashpa ricupanguilla” nishpa. Chai nishcaca paicunata cuidajpaca alimi carca.

Ña chunga punlla jipa Danielta, paipa quimsa cumbacunatapash ‘ñavita ricujpica, jatun mandajpaj micunata micuj huambracunatapash ashtahuan alicunami’ ricurirca. Jehová Diosca chai chuscu jovenguna paita cazushcamandaca cushijushcami carca. Danielman Jehová Dios ali yuyaita cujpimi muscuipishna tucui ricushcatapash ricui usharca, muscuicuna ima cajtapash yachai usharca.

Chai jovenguna ña quimsa huatacunata yachajushca jipaca Aspenazca Nabucodonosor reypamanmi paicunataca pusharca. ‘Chaipimi jatun mandajca paicunahuan parlarca. Chai tucui jovengunamandaca Daniel, Hananías, Misael, Azarías paicunashnaca pipash na tiashcatami’ cuenta japirca. Chaimandami paicunataca jatun mandajpa huasipi trabajachun agllarca. Jipamanga tauca viajemi Nabucodonosorca imapash importante cosascunata decidigrijushpaca chai jovengunata tapun carca. Jehová Diosca rey Nabucodonosorpa ‘alipacha yachajushcacunamanda’, ‘llactapi tiaj tucui yachajcunamanda’ ashtahuan yali yachaitami chai chuscu jovengunamanga curca.

Daniel, Hananías, Misael, Azariaspash na paicunapa llactapi carcachu. Shinapash siempremi Jehová Diosta sirvijcuna cashcata yarin carca. Canga, canba taitacuna na canhuan cajpica, ¿Jehová Diosta siemprechu yarigringui?