Ked o Navuhodonosor ljegardža e knezon andi Juda ko Vavilon, čhivdža e Asfenaze, kova služindža ko kraljevsko dvor, te nadgledini ljen. O Navuhodonosor phendža e Asfenazese te birini maškaro ljende terne čhaven kola tane najsaste hem najgodžalje. Akala terne čhave valjandže te školujinen pe trin berš, te šaj palo odova te služinen ko kraljevsko dvor ko Vavilon. On valjandže te sikljon te čitinen, te pisinen hem te vačeren ki čhib koja koristindža pe ko Vavilon. Isto adžahar, valjandže te han odova habe so halja o kralj hem oljese manuša. Štar kotar akala terne hine o Danilo, o Ananija, o Misailo hem o Azarija. O Asfenaz dindža ljen vavilonska nava: Valtasar, Sedrah, Misah hem  Avdenago. Da li odova so sikljilje ko kraljevsko dvor ka cidel ljen ando Jehova?

Akala štar terne odlučindže te oven poslušna e Jehovase. On džandže so na valjani te han ando habe kova halja o kralj, sose e Jehovaso zakon zabranindža te han pe disave životinje. Odoljese, on phendže e Asfenazese: „Molinaja tut, ma čhiv amen te ha ando e kraljeso habe.“ O Asfenaz phendža ljendže: „Ako na hana, pa naborsaljona, o kralj ka mudari man!“

O Danilo hine lje jekh ideja. Ov phendža e Asfenazese: „Molinaja tut, de amen deš dive te ha samo povrće hem te pija pani. Palo odova, dikh sar ka izgledina amen, a sar o terne so hana kotar e kraljeso habe.“ O Asfenaz složindža pe.

Palo deš dive, o Danilo hem oljese trin amala izgledindže but posaste kotar avera terne. O Jehova but radujindža pe so ačhilje ljese poslušna. Ov čak dindža e Danilose mudrost te haljol o vizije hem o sune.

Ked oljengo školovanje završindža pe, o Asfenaz ljegardža e ternen anglo Navuhodonosor. Ov vačerdža oljencar hem dikhlja so o Danilo, o Ananija, o Misailo hem o Azarija tane pogodžalje hem so pošukar haljona o buča ando avera terne. Tegani birindža ljen te čeren buti ko kraljevsko dvor. Ked valjandža te anel o važna odluke, o kralj često rodindža savet oljendar. O Jehova dindža ljendže mudrost koja hine pobari andi mudrost koja hine ljen sa e kraljese manuša hem oljese mađioničarija.

Iako hine ki aver phuv, o Danilo, o Ananija, o Misailo hem o Azarija na bisterdže so o Jehova tano oljengo Devel. Da li hem tu ka ove uvek poslušno e Jehovase, čak ked na hijan te roditeljencar?