О Навуходоносоро заля андо Вавилоно лэ князёнэн анда Иуда. Во ԥэндя еқэ манушэсти, саво терэлас дила кай о царё, тэ диқэл пала лэндэ. Кадэлэ манушэс ақарэнас Асфеназо. О Навуходоносоро приԥэндя лэ Асфеназости тэ витидэл андар лэндэ само годявэрнэн и зоралэн манушэн. Васо? Кай тэ сытярэл лэн трин бэрш, кай вонэ тэ авэн барэ мануша андо Вавилоно. Вонэ трэбуй сас тэ сытён тэ адинон, тэ пистрон и тэ дэн дума пэ кодэя шыб, пэ сави дэнас дума андо Вавилоно. Инке вонэ трэбуй сас тэ хан кацаво же хамос, саво халас о царё и кодэла, ко терэнас дила лэстэ. Штарэ кадэлэ манушэн ақарэнас Даниило, Анания, Мисаило и Азария. Андо Вавилоно лэнди динэ авэр алава, Валтасаро, Седрахо, Мисахо и Авденаго. Парашэлэ  кадэла тэрнэ мануша тэ кандэн лэ Иеговас после кода, сости сытелэ?

Кадэла штар тэрнэ мануша витидэ тэ кандэн лэ Иеговас. Вонэ на камлэ тэ хан о хамос, саво хал о царё. Васо? Андэ лэ Иеговаско законо пистромэ, кай нащи тэ хан дэсавэн животнонэн. Важ када вонэ ԥэндэ лэ Асфеназости: «Мангас тут, на ԥэн амэнди, кай амэ тэ хас о хамос, саво хал о царё». О Асфеназо ԥэндя лэнди: «Сар тумэ на лэна тэ хан о хамос и о царё диқэла, кай тумэ, сар насвалэ, во умарэла ман!»

Тоди о Даниило погиндосардя и акэ со ԥэндя лэ манушэсти, саво диқэлас пала лэндэ: «Мангас тут, дэ амэнди дэш деса ек и овощи и о паи. Ай тоди диқэса, савэ аваса амэ и савэ авэна кодэла, ко хан о хамос, саво хал о царё». И о мануш, саво диқэлас пала лэндэ ԥэндя, кай во када стерэла.

Кала прожылэ дэш деса, о Даниило и трин лэстирэ друӷоря сас май зоралэ, чем авэр тэрнэ мануша. О Иегова сас фартэ радо кодэлэсти, кай вонэ на парашэлэ лэс тэ кандэн. И во дя лэ Даниилости, кай во тэ полэл и видения и сунэ.

Кала всаворэн досытярдэ, о Асфеназо андя лэ тэрнэ манушэн каринг о Навуходоносоро. Кала во подя дума лэнца, во поля, кай о Даниило, о Анания, о Мисаило и о Азария сас май годявэрнэ. Кадяжэ вонэ вся май йто полэнас, чем всаворэ авэр. О Навуходоносоро витидя кадэлэ штарэ манушэн, кай вонэ тэ терэн лэстэ дила. О царё часто пушэлас лэндар, со и сар тэ терэл андэ бари дила. О Иегова стердя кадя, кай кадэла штар мануша тэ авэн май годявэрнэ, чем лэ царёстирэ годявэрнэ мануша, савэ бут ӷанэн и кодэлэндар, ко драбатярэн.

Хоть о Даниило, о Анания, о Мисаило и о Азария жувэнас андэ най пэстири ԥув, вонэ на бистэрдэ, кай вонэ анда лэ Иеговаско народо. Лэса ту вся время тэ сэрэс пала Иегова даже тоди, кала тирэ родителёнэн нинай паша тутэ?