Su tempong Nebukhadnezar nẹ̌bawa keluarga kerajaan dingangu manga anạu bangsawan Yehuda sarang Babelẹ̌, i sie něhengkẹ pejabat istana arenge Aspenaz gunang měngurusẹ̌ si sire. Nebukhadnezar něngoro si Aspenaz pěmile manga anạ esẹ sěbạe masehatẹ̌ dingangu pande bọu tal᷊oarang i sire. Manga anạ mangudạ ene sarung těntirong karěngụe tělu taung gunang makoạ pejabat penting su Babelẹ̌. I sire harusẹ̌ měngěndung mẹ̌basa, měmohẹ, dingangu mẹ̌bisara měpakẹ bawerang tau Babelẹ̌, werang Akad. I sire lai harusẹ̌ kumaěng kaěng kere kẹ̌kanengangu Datu dingangu manga pejabat. Bọu tal᷊oarang manga anạ mangudạ ene, piạ i Daniel, Hanania, Misyael, dingangi Azaria. Aspenaz něgělị areng buhu si sire su werang Babelẹ̌: Beltesyazar, Syadrakh, Mesyakh, dingangu  Abednego. Apa kěbị ene sarung makakoạ si sire měngědo maněmbah si Yehuwa?

Ěpạ u katau mangangudạ ini mapulu turusẹ̌ masatia si Yehuwa. I sire masingkạ tawe wotonge kumaěng kaěngu Datu ual᷊ingu piạ piram baụ haram tumuhụ Hukung i Yehuwa. Hakị u ene, i sire nẹ̌bera si Aspenaz, ’Tul᷊ungko abe oro i kami kumaěng kaěngu Datu.’ Aspenaz nẹ̌bera, ’Mạeng i kamene tawe kumaěng, kụ Datu makasilo i kamene masakị, i sie sarung měmate si siạ!’

Daniel někoạ rencana. I sie naul᷊ị si Aspenaz, ’Tul᷊ungko pěgělị si kami dukụ dingangu akẹ karěngụe mapul᷊o ěllo. Bọu ene, pěmanda kerea i kami dingangu kerea manga anạ bal᷊inẹ apang kụkaěng kaěngu Datu.’ Aspenaz setuju.

Su apang seng nal᷊iu mapul᷊o ěllo, i Daniel dingangu tatělu hapịe nikasilong limembong masehatẹ̌ sul᷊ungu manga anạ bal᷊inẹ. Yehuwa mal᷊uasẹ̌ ual᷊ingu i sire matuhụ si Sie. I Sie lai něgělị si Daniel kemampuan gunang makaěna penglihatan dingangu ipi.

Su apang manga anạ mangudạ ene seng bọu nilatih, Aspenaz nẹ̌bawa si sire sarang Nebukhadnezar. Datu nẹ̌bisara dingangi sire, kụ i sie němanda i Daniel, Hanania, Misyael, dingangi Azaria limembong pande dingangu matahuěna sul᷊ungu anạ bal᷊inẹ. Hakị u ene, i sie němile si sire ěpạ gunang měhal᷊ẹ̌ su istana. Datu masau mẹ̌dorong sasasa bọu i sire gunang masalah penting. Yehuwa někoạ si sire limembong matahuěna sul᷊ungu lawọ taumata matahuěna dingangu mapapandeng ilmu gaib su Babelẹ̌.

Maning bal᷊inẹ su wanuang i sire hala, i Daniel, Hanania, Misyael, dingangi Azaria tawe niwul᷊e i sire kai ělang i Yehuwa. Apa i kau lai sarung turusẹ̌ mẹ̌tahěndung si Yehuwa maning i kau marau bọu matimadu?