Nabucodonosor ni̱jkha̱ kagui̱i̱n náa Babilonia príncipes bi̱ kuwa náa Judá ga̱jma̱a̱ nigíiʼ mbáa xa̱bu̱ bi̱ naxná ikha bi̱ mbiʼyuu Aspenaz mú mañawu̱u̱n. Ma̱ngaa niʼthúu̱n xa̱bu̱ bugi̱ rí mbañíinʼ jiáma bi̱ tséʼniún nandii ga̱jma̱a̱ bi̱ wabaʼ e̱dxúún makru̱ʼu̱u̱n májánʼ. Jiáma bugi̱ mudrigú mbá kiʼsngáa kiejunʼ mbá ajtsú tsiguʼ mú xúʼko̱ ma̱ndoo mani̱ndxu̱u̱n bi̱ muxna ikha bi̱ maguaʼdáá numún náa Babilonia. Mbaʼyóoʼ majmañún muraxnuu, muniraʼmáʼ ga̱jma̱a̱ muthi ajngáa acadio rí nuthi náa Babilonia. Ma̱ngaa mbaʼyoo mu̱phu̱ ikháá má ganitsu rí natrámáʼ náa palacio ndrígóo rey. A̱jkhui̱i̱n jiáma bugi̱ mbiʼñún Daniel, Hananías, Misael ga̱jma̱a̱ Azarías. Mú Aspenaz nixná imbo̱ʼ mbiʼñún rí xóo nuxna mbiʼñún babilonios: Beltsasar, Sadrac, Mesac ga̱jma̱a̱ Abednego. Lá naku̱ma̱ʼ rí kiʼsngáa rí mudrigú maʼni rí marájñunʼ náa Jeobá xáʼ.

 A̱jkhui̱i̱n jiáma bugi̱ nindúún rí munimbu̱u̱n kuyáá Jeobá. Ma̱ngaa ndiyáá rí xándoo mu̱phu̱ ganitsu ndrígóo rey numuu rí náa Xtángoo ndrígóo Jeobá naʼthí rí xándoo mu̱phu̱ tikhu ganitsu. Ikha jngó nitháán Aspenaz: “Mbá péñu, xatatsudáá muphúxu ikhaa má ganitsu rí na̱ʼkhu̱ rey”. Ikhú Aspenaz niʼthúún: “Á mu tsepiʼtsula májánʼ, ga̱jma̱a̱ rey gaʼyoo rí nandoo káñála, ikhaa maxíñu̱u̱n”.

Ikhú Daniel ndiʼyoo mbá rí maʼni. Ikha jngó niʼthún bi̱ nañewu̱u̱n: “Mbá péñu, araxnúxu i̱ndó verduras ga̱jma̱a̱ legumbres ga̱jma̱a̱ iyaʼ mbá gu̱wa̱ʼ mbiʼi. Ga̱jma̱a̱ nda̱wa̱á gáta̱ya̱a̱ xú kaʼniún jiáma bi̱ ni̱ʼphu̱ ganitsu dí na̱ʼkhu̱ rey”. Ikhú bi̱ nañewu̱u̱n ndiʼyoo rí májánʼ nindxu̱u̱.

Índo̱ ninújngoo gu̱wa̱ʼ mbiʼi, Daniel ga̱jma̱a̱ ajtsíin bi̱ nambáxu̱u̱ gajmíi̱n nakujmiin itháan míjínʼ ki xóo eʼwíínʼ jiáma. Jeobá nadxuu wéñuʼ kaʼñúún numuu rí ninimbu̱ún kuyáá ikhaa. Ma̱ngaa nixnúu ku̱ma̱ Daniel mu makro̱ʼo̱o̱ visión ga̱jma̱a̱ xnuʼndaa.

Índo̱ nirámáʼ ajtsú tsiguʼ dí nigumaratiin, Aspenaz ni̱jkha̱ kagui̱i̱n jiáma bugi̱ náa Nabucodonosor. Rey niʼtámíjná gajmíi̱n ikhiin ga̱jma̱a̱ ndiʼyoo rí Daniel, Hananías, Misael ga̱jma̱a̱ Azarías najmañún itháán ki xóo eʼwíínʼ jiáma. Ikha jngó niraʼwíin mu muñejunʼ náa corte real. Nda̱wa̱á dí rúʼko̱, mbaʼa nuthu rey na̱nda̱ʼa̱ xtágabu mu maʼni mbá ñajunʼ rí gíʼdoo numuu. Jeobá nixnúún itháan ku̱ma̱ ki xóo bi̱ nduyáá wéñuʼ ga̱jma̱a̱ magos ndrígóo rey.

Daniel, Hananías, Misael ga̱jma̱a̱ Azarías na̱nguá kuwa náa xuajñún, mú nirmáʼáan má xúʼko̱ a̱jkiu̱ún rí mangiin nindxúu̱n xa̱bi̱i̱ Jeobá. Ikháánʼ rá. Índo̱ ana̱ʼ ga̱jma̱a̱ ru̱dáʼ nánguá kuwa ga̱jma̱á ni̱ndxa̱ʼ, lá mangáán marmáʼáan a̱jkia̱nʼ má xúʼko̱ xtayáá Jeobá ráʼ.