Etena kakatɔlɛ Nɛbukadinɛza ɛlɔhɛ w’ase Juda otsha la Babilɔna, Nɛbukadinɛza akasha owandji w’ɛnɛnɛ wakawelɛka Ashɛpɛnazɛ ɔkɛndɛ wa mbalama. Nɛbukadinɛza akatɛ Ashɛpɛnazɛ dia nyanga ana w’apami wakaleke alemba amɛna ndo wakaleke timba l’atei awɔ. Ana w’apami asɔ wakahombe ndowanyema l’edja k’ɛnɔnyi esato. Olowanyelo ɔsɔ wakahombe mbalɔngɔsɔla dia monga ewandji wa weke la Babilɔna. Ana w’apami asɔ wakahombe mbeka woho wa mbadia, mfunda ndo ntɛkɛta ɔtɛkɛta w’ase Babilɔna w’Akadiya. Vɔ wakalɔmbamaka nto dia ndɛ mbo ya ndɛ yakalɛka nkumekanga ndo ɛnɛnɛ ande. L’atei awɔ mbaki ana w’apami anɛi anɛ: Danyɛlɛ, Ananiya, Meshakɛ ndo Azariya. Ashɛpɛnazɛ akayowaɔlɛ nkombo y’eyoyo y’ase Babilɔna nyɛ: Bɛlɛtɛshaza, Shadrakɛ, Meshakɛ ndo Abɛdɛ-Nɛngɔ. Onde  olowanyelo ɔsɔ wakakoke mbakonya dia ntshika kambɛ Jehowa?

Ana w’apami anɛi asɔ wakɔshi yɛdikɔ ya nkitanyiya Jehowa. Vɔ wakeyaka ɔnɛ takawahombe ndɛ mbo ya ndɛ ya nkumekanga, nɛ dia Ɔlɛmbɛ wa Jehowa wakataka dia mɔtshi l’atei ayɔ yaki mindo. Ɔnkɔnɛ vɔ wakatɛ Ashɛpɛnazɛ ɔnɛ: ‘Lam’alangayɛ totoshake mbo ya ndɛ ya nkumekanga.’ Ashɛpɛnazɛ akawatɛ ate: ‘Naka nyu hanyole ko nkumekanga nyɛna nyaya oko anto wele la hemɔ, kete nde ayondjaka!’

Danyɛlɛ aki la kanyi mɔtshi. Nde akatɛ olami awɔ ate: ‘Lam’alangayɛ otoshake paka akatshikatshi ndo ashi l’edja ka nshi dikumi. Oma laasɔ, koyotɛdike l’ana w’apami walɛ mbo ya ndɛ ya nkumekanga.’ Olami aketawɔ.

L’ɔkɔngɔ wa nde mpemba dui sɔ l’edja ka nshi dikumi, akɛnama dia Danyɛlɛ nde la angɛnyi ande asato wakaleke ana w’apami akina tshɛ alemba w’amɛna. Jehowa akangɛnangɛna nɛ dia vɔ wakokitanyiya. Nde akasha Danyɛlɛ lomba la nshihodia waɛnɛlɔ ndo alɔ.

Etena kakashile olowanyelo, Ashɛpɛnazɛ akatɔlɛ ana w’apami asɔ le Nɛbukadinɛza. Nkumekanga akasawola la wɔ ndo akɛnyi dia Danyɛlɛ, Ananiya, Mishaɛlɛ ndo Azariya wakaleke ana w’apami akina tshɛ yimba ndo kɛsɔ. Nde akasɔnɛ ana w’apami anɛi asɔ dia nkamba laka nkumekanga. Mbala efula, nkumekanga akawalɔmbaka alako lo kɛnɛ kendana l’awui w’ohomba. Jehowa akawakonya akanga wa timba ndeka apami tshɛ wa timba ndo w’ase maji wa nkumekanga.

Kaanga mbakiwɔ lo wodja okina, Danyɛlɛ, Ananiya, Mishaɛlɛ ndo Azariya kombohɛ dia vɔ waki ekambi wa Jehowa. Onde ndo wɛ la wɔ ayohɔka Jehowa mbala tshɛ kaanga etena kele ambutshi ayɛ bu kaamɛ la yɛ?