Ciindi Nebukadinezara naakatola basilutwe baba Juda ku Babuloni, wakaambila basikalumamba kuti bamujanine basankwa balaaziwa zibotu alimwi basongo. Basankwa aaba bakeelede kuyiisyigwa kwamyaka yotatwe. Lwiiyo oolu lwakali kuyoopa kuti balibambile kuba azyuuno zyaatala kapati mu Babuloni. Nebukadinezara wakabikka silutwe wamunkuta Asipenazi kuti alanganye basankwa aaba. Basankwa aaba bakeelede kwiiya kubala, kulemba akwaambaula mwaambo waba Kasidi waku Babuloni. Alimwi bakeelede kunoolya zilyo nzizyonya nzyaakali kulya mwami abasinkuta bakwe. Akati kabasankwa aaba ibakasalwa, kwakali Daniele, Hananiya, Misayeli, alimwi a Azariya. Asipenazi wakabapa mazina mapya aaku Babuloni aakuti, Belitsazara, Sadirake, Mesaki alimwi a  Abedinego. Sena lwiiyo oolu lwakali kuyoopa kuti bacileke kubelekela Jehova?

Basankwa aaba ibali 4 bakalikanzide kubelekela Jehova. Bakalizyi kuti tiibakeelede kulya zilyo zyamwami nkaambo Mulawo wa Jehova wakali kwaamba kuti zimwi zyakalisofweede. Aboobo bakaambila Asipenazi kuti: ‘Twalomba kuti utatupi zilyo zyamwami.’ Asipenazi wakabaambila kuti: ‘Ikuti kamutalyi mpoonya mwami akamubone kuti mwakoka, uyoondijaya!’

Daniele wakaba amuzeezo. Wakaambila sikubalanganya kuti: ‘Twalomba kuti kotupa buyo cisyumani amaanzi kwamazuba aali 10. Kumane ukatweezyanisye abasankwa ibalya zyakulya zyamwami.’ Sikubalanganya wakazumina.

Nowakainda musunko wamazuba aali 10, Daniele abeenzinyina botatwe bakali kulibonya kabotu kwiinda basankwa bambi boonse. Jehova wakakkomana kuti bakamumvwida. Mane buya wakapa Daniele busongo bwakupandulula zilengaano alimwi aziloto.

Lwiiyo nolwakamana, Asipenazi wakabaleta basankwa aaba kuli Nebukadinezara. Ciindi mwami naakabandika ambabo wakabona kuti Daniele, Hananiya, Misayeli alimwi a Azariya bakali basongo alimwi bakalicenjede kwiinda basankwa bambi boonse. Wakabasala aaba ibali 4 kuti kababelekela munkuta yakwe yabwami. Kanji-kanji mwami wakali kubabuzya kujatikizya mbobakali kuyeeya mumakani aayandika kapati. Jehova wakabapa busongo bwiinda bwabaalumi bamwami boonse alimwi abasimajiki.

Nokuba kuti bakali kucisi citali cabo, Daniele, Hananiya, Misayeli alimwi a Azariya kunyina nobakaluba kuti bakali bantu ba Jehova. Sena anduwe uyoozumanana kumuyeeya Jehova, nokuba kuti toli aabazyali bako?