Ja Nabucodonosor yiʼaj och bʼa Babilonia ja olomalik bʼa Judá sok yaʼa bʼa skʼabʼ jun tejkʼanubʼal bʼa snaj ja mandaranum sbʼiʼil Aspenaz. Cha yayi mandar ja Aspenaz a-sleʼ ja keremtik bʼa lek aye sok jel biboʼe. Ja keremtik it oj yiʼe jun tikʼe xchapjele bʼa oxe jabʼil. Ja chapjelal jaw oj koltajuke bʼa oj staʼe chaʼan xchole ja bʼa Babilonia. Tʼilan oj snebʼe skʼumajel, stsʼijbʼajel sok snebʼjel ja kʼumal acadio bʼa Babilonia. Cha ojni yabʼye ja waʼelal wa x-aji bʼa snaj ja mandaranumi. Chane ja bʼa keremtik it yeʼn ja Daniel, Hananías, Misael sok Azarías. Pe ja Aspenaz sleʼayi sbʼiʼile jach bʼa Babilonia: Beltsasar, Sadrac, Mesac sok Abednego. Soka tikʼe chapjelal oj ajukyile, ¿oj maʼ sjipekan ja Jyoba?

Ja chanwane keremtik it wa skʼanawe ajyel kʼuʼabʼal soka Jyoba.  Wa snaʼawe mi lek oj yabʼye ja swaʼel ja mandaranumi yujni ja Ley bʼa Jyoba wa xyala jujuntik ja waʼelik jaw mi lek yabʼjel. Ja yuj skʼanaweyi ja Aspenaz: «Awa pabor, moka tʼenotikon yabʼjel ja swaʼel ja mandaranumi». Pe ja Aspenaz yala: «Ta mi la waʼyex lek, sok ja mandaranum xyila mi lekuk akʼeljelex, ojni smilon».

Ja Daniel ay jas snaʼa. Yalyabʼ ja talnanumi: «Awa pabor, kechan akitikon sat jastik junuk, itajik sok jaʼ bʼa 10 kʼakʼu. Ti xwa jlaj jbʼajtikon soka tuk keremtik bʼa ja yabʼye ja swaʼel ja mandaranumi». Ja talnanumi lek yabʼi.

Yajni ekʼ ja 10 kʼakʼu, ja Daniel soka oxwane yamigo masni jel lek skʼeljele yuja tuk keremtiki. Ja Jyoba jelni gusto ajyi soka yeʼnle yuja ajyiye kʼuʼabʼali. Cha yayi ja Daniel biboʼil bʼa yabʼjel stojolil ja nakʼsatalik soka wayichalik.

Yajni tsʼikwi ja oxe jabʼil bʼa xchapjele, ja Aspenaz yiʼaj och ja keremtik ja bʼay ja Nabucodonosor. Ja mandaranumi och loʼil soka yeʼnle sok yila ja Daniel, ja Hananías, ja Misael soka Azarías masni jel biboʼe yuja tuk keremtiki. Ja yuj stsaʼa bʼa ti oj aʼtijuke bʼa snaj. Sok tikʼanxta skʼanayi rason bʼa jastik jel tʼilan. Ja Jyoba yayi mas biboʼil ja yeʼnle yuja tuk biboʼik sok skʼintanum ja mandaranum.

Anima ja Daniel, ja Hananías, ja Misael soka Azarías mi teyuke bʼa xchonabʼe, pe tolabida julskʼujol teye bʼa xchonabʼil ja Jyoba. Yajni mi teyuka mok jawa nantati, ¿oj maʼ juluka kʼujol tolabida bʼa Jyoba?