Nebukadeneza obu yatwaire ababiito ba Yuda omu Baburoni, akataho Asipenazi ow’akaba ali mukuru omu bukama bwa Baburoni kubaroleerra. Nebukadeneza akagambira Asipenazi kumuserurramu aboojo abaine amagezi kandi abomeezi kurungi. Aboojo banu bakutendekerwe kumara emyaka esatu kandi okutendekebwa kunu kwakubasobozeseze kuba bakuru omu obukama bwa Baburoni. Aboojo banu bakaba basemeriire kwega kusoma, kuhandiika hamu n’okwega orulimi orwa Baburoni orukwetwa Akkadian. Kandi nabo baali basemeriire kulya hamu n’abakuru ha by’okulya eby’omukama. Aboojo banu bbana bakaba bali Danieri, Hananiya, Misaheri hamu na Azaliya. Baitu Asipenazi akabaruka amabara agandi: Beritesaza, Saduraki, Mesaki, hamu na  Abedenego. Okutendekebwa kunu kwakubalemeseze kuheereza Yahwe?

Aboojo banu bakaba beheriireyo kimu kusigara bali besigwa hali Yahwe. Kandi bakaba bakimanyire ngu tibasemeriire kulya eby’okulya by’omukama habwokuba ebimu ha byokulya binu byali bitarukwikirizibwa omu Biragiro bya Yahwe. Bakagambira Asipenazi bati: ‘Tukonyere otatuliisa eby’okulya by’omukama.’ Asipenazi akabagarukamu ati: ‘Obu muraaba mutaliire kikabaletera kuzooka kubi, omukama naija kunyita!’

Danieri akagambira Asipenazi ati: ‘Tuhe emikubi y’ebikoora hamu n’amaizi kumara ebiro ikumi, hanyuma otulengesanize hamu n’aboojo abarukulya eby’okulya eby’omukama.’ Asipenazi akaikiriza.

Hanyuma y’ebiro ikumi, Danieri n’abanywani be basatu baali nibazooka kurungi kukira aboojo abalyaga eby’okulya by’omukama. Kikasemeza muno Yahwe habwokuba aboojo banu baali borobiire ebiragiro bye. Kandi Yahwe akaha Danieri obusobozi bw’okumanya amakuru gokwolekwa hamu n’okurotorra ebirooto.

Obu bamazire kutendekebwa, Asipenazi akatwara aboojo hali Omukama Nebukadeneza. Omukama Nabukadeneza akabaza n’aboojo kandi yarora ngu Danieri, Misaheri, Hananiya hamu na Azaliya bakaba bali bagezi muno kukira aboojo abandi. Kandi akabakoma kumuherezaaga omu kikaali kye. Omukama Nebukadeneza yabehanuzaahoga ha nsonga enkuru muno habwokuba Yahwe akaba abafoire bamagezi muno kukira abasaija be abamagezi abamuhaburaga hamu n’abafumu be.

N’obukiraaba ngu Danieri, Hananiya, Misaheri, hamu na Azaliya bakaba bali omu nsi etali y’owabo, bakaikara bakimanyire ngu baali bahereza ba Yahwe. Naiwe oraikara n’okora Yahwe eby’agonza n’obworaaba otali haihi n’abazaire baawe?