Навуходоносор хаан Иуданың нояннарын Вавилонче аппаргаш, дүжүметтерниң даргазы Асфеназка олар дээш сагыш човаарын дагзып каан. Навуходоносор оларның аразындан угаан-сарыылдыг, кадык аныяк оолдарны шилип алгаш, үш чыл ишти өөреткеш, Вавилонга эрге-дужаалдыг улус кылып каар кылдыр, Асфеназка айыткан. Олар тус черниң дылынга номчуп, бижип, чугааланып өөренип алыр ужурлуг турган. Оон ыңай олар хаанга болгаш ооң дүжүметтеринге бээр аъш-чемни чиир ужурлуг турган. Ол аныяк оолдарның аразынга Даниил, Анания, Мисаил база Азария турган. Оларга Белтешацар, Седрах, Мисах болгаш Авденаго деп аттарны тывыскан. Ол өөредилге оларга кандыг салдар чедирер? Олар Иеговага дыңнангыр артар бе?

 Ол дөрт оол Иеговага шынчы артар деп шиитпирлээн. Хаанның аъжы-чеминиң аразынга Иегованың хоойлузу-биле чивес ужурлуг дириг амытаннарның эъди турган. Ынчангаш олар Асфеназтан: «Хаанның аъш-чемин чиир кылдыр бисти албадавайн көрүңер» — деп дилээн. Асфеназ: «Ону чивес болзуңарза, хаан силерниң арган-дорганныңарны көрүп кааш, мени өлүрүп каар!» — деп удурланган.

Ынчан Даниил таңныылга мынча дээн: «Он хонук ишти биске чүгле ногаа аймаа, сугдан берип көрүңер. Оон хаанның аъш-чемин чип турган оолдар-биле бисти деңнеп көөр силер». Таңныыл чөпшээрешкен.

Он хонук эрткенде, Даниил болгаш ооң үш эжи өске оолдардан шыырак көстүр болган. Олар шынчы боорга, Иегова аажок өөрүп турган. Ол безин Даниилге дүштерни болгаш көстүүшкүннерни тайылбырлаар мерген угаанны берген.

Иегова оларны хаанның мерген угаанныгларындан, караң-көрнүрлерден артык мерген угаанныг кылып каан. Өөредилге төнген соонда Асфеназ оолдарны Навуходоносорга эккелген. Хаан олар-биле чугаалашкаш, Даниил, Анания, Мисаил, Азария өске оолдардан угаанныг деп көрүп каан. Ол оларны ордуга бараалгаар кылдыр шилип алгаш, чугула айтырыгларны олар-биле сүмележир турган.

Ол оолдар өске черде-даа болза, Иеговага бараалгалын утпайн чораан. Ада-иең чаныңга чок турда безин, Иегованы кезээде бодап чоруур-дур сен бе?