Li Nabukodonosore laj yikʼ batel ta Babilonia li buchʼutik tsots yabtelik ta Judae, vaʼun laj yalbe Aspenas ti jaʼ yichʼoj yabtel ta snail pasob mantal ti akʼo skʼel li buchʼutik tsots yabtelike. Xchiʼuk xtok, albat yuʼun Nabukodonosor ti akʼo stʼuj jayvoʼuk keremetik ti lek tsotsike xchiʼuk ti lekuk pʼijike. Li keremetik taje ta xichʼik lek chanubtasel oxib jabil sventa xichʼ akʼbel tsots yabtelik li ta Babiloniae. Skʼan xchanik lek li akadio kʼop ta Babiloniae xchiʼuk skʼan xchanik stsʼibael. Jech xtok skʼan slajesik li veʼlil ti chakʼik ta sna ajvalile. Li chanvoʼ keremetike jaʼ sbiik: Daniel, Ananias, Misael xchiʼuk Asarias. Pe jelbat sbiik yuʼun li Aspenase, la sbiinik jech kʼuchaʼal li jbabiloniaetike: Beltsasar, Sadrak, Mesak xchiʼuk Abednego.  ¿Kʼusi chanop li voʼote? ¿Mi xuʼ van xnamajik ta stojolal Jeova ta skoj li chanubtasel akʼbatike?

Li chanvoʼ keremetike jpʼel ta yoʼontonik ti ta xchʼunbeik smantal li Jeovae. Jech xtok, snaʼojik lek ti mu stakʼ slajesbeik sveʼel li ajvalile, yuʼun chal Smantal Jeova ti mu stakʼ slajesik li jlom veʼliletik taje. Jech oxal, xi la skʼanbeik vokol li Aspenase: «Avokoluk, mu me xasujunkutik ti akʼo jlajeskutik li sveʼel ajvalile». Pe xi laj yal li Aspenase: «Mi muʼyuk lek chaveʼike xchiʼuk mi laj yil ajvalil ti ipoxuke, voʼoxuk me ta akojik mi la smilun li ajvalile».

Pe oy kʼusi la snop li Daniele, yuʼun xi laj yalbe li jchabivaneje: «Avokoluk paso preva avil lajunebuk kʼakʼal, jaʼ noʼox akʼbun jlajeskutik li kʼusitik chchʼi ta balumile xchiʼuk akʼbun kuchʼkutik voʼ. Vaʼun koʼoltasunkutik xchiʼuk li yan keremetik ti koʼol sveʼelik xchiʼuk li ajvalile». Lek laj yaʼi li jchabivaneje.

Kʼalal echʼ lajuneb kʼakʼale, vinaj ti mas lek tsotsik li Daniel xchiʼuk li oxvoʼ yamigotake. Xmuyubaj tajek li Jeovae, yuʼun la xchʼunbeik smantal. Jech xtok, li Jeovae laj yakʼbe spʼijil Daniel sventa xaʼibe smelolal li vaychiletike xchiʼuk li kʼusi ch-akʼbat ta ilele.

Kʼalal tsʼaki oxib jabil ti chanubtasatike, li Aspenase laj yikʼ batel ta stojolal Nabukodonosor li keremetike. Li ajvalile la xchiʼinan ta loʼil, vaʼun laj yakʼ venta ti mas pʼijik li Daniel, Ananias, Misael xchiʼuk Asariase ti jaʼ mu sta li yan keremetike. Jaʼ yuʼun la stʼuj sventa teuk x-abtejik li ta spasob mantale. Jaʼ yuʼun kʼalal oy kʼusitik tsotsik skʼoplal tskʼan tspas li ajvalile tsjakʼbe baʼyel li chanvoʼ keremetike. Yuʼun akʼbat mas spʼijilik yuʼun Jeova ti jaʼ mu sta spʼijil li buchʼutik ch-abtejik ta stojolal ajvalile xchiʼuk li buchʼutik tspasik majiae.

Li Daniel, Ananias, Misael xchiʼuk Asariase muʼyuk te oyik li ta slumalike, pe te oy ta sjolik ti jaʼik yajtuneltak Jeovae. Li voʼote, ¿kʼusi van chapas ti muʼyukuk te achiʼuk li atot ameʼe? ¿Mi te ta ajol ek ti jaʼ yajtunelot Jeovae?