Ọke rẹ Nẹbukadreza vwo mu isun rẹ Juda kpo Babilọn, ọ da tanẹ Ashpenaz vwẹrote ayen. Ovie na da vuẹ Ashpenaz nẹ ọ sane emeshare ri me vwo erhuvwu re je ma sasa vwẹ usun rayen. E che yono ighene nana vwẹ ẹgbukpe erha. Uyono na che muegbe rayen vwọ dia ihwo re vwẹrote ẹdia sansan vwẹ Babilọn. Ayen che yono obo ra jẹ ejajẹ rẹ Babilọn re se Akkadian, ayen ji che yono obo re se vẹ obo re sio. A cha kẹ ayen emu rẹ ovie na ria. Usun rẹ emeshare nana yehẹ Daniẹl, Hananaya, Mishẹl, kugbe Azaraya. Ashpenaz de mu edẹ rẹ Babilọn kẹ ayen: Bẹlteshaza, Shadrack, Meshak, kugbe Abẹdnigo. Uyono nana cha nẹrhẹ ayen dobọ rẹ ẹga rẹ Jihova ji?

 Emeshare ẹne nana muegbe ayen vwo nyupho rẹ Jihova. Ayen riẹnre nẹ ofori ayen vwọ riemu rẹ ovie na-a kidie Urhi rẹ Jihova gha evo usun rẹ emu rayen. Ọtiọyena, ayen da vuẹ Ashpenaz nẹ, ‘Biko wọ kẹ avwanre emu rẹ ovie na-a.’ Ashpenaz da kpahen kẹ ayen: ‘Ovwan rha riemu na-a, ovie na da mrẹ nẹ ovwan pha dọndọn, o che hwe vwe!’

Iroro ọvo da djẹ ro ẹwẹn rẹ Daniẹl. Ọ da ta kẹ ohwo rọ vwẹrote ayen na: ‘Biko kẹ avwanre ifọ vẹ ame ọvo vwẹ ẹdẹ ihwe. Rere wọ vwẹ avwanre vwọ vwanvwen emeshare ichekọ re riemu rẹ ovie na.’ Ohwo rọ vwẹrote ayen na da rhọnvwe.

Ẹdẹ ihwe na vwọ wan nu, oma da nabọ ro Daniẹl vẹ igbeyan rọyen erha na vwọ vrẹ emeshare ri chekọ na. Oma vwerhen Jihova nẹ ayen nyupho rọyen. Ọ da kẹ Daniẹl aghwanre ro vwo vwo ẹruọ rẹ emramrẹ vẹ evwerhẹn.

Ọke rẹ uyono rayen na vwo re nu, Ashpenaz de mu emeshare na bru Nẹbukadreza rhe. Ovie na de nene ayen ta ota, ọ da mrẹ nẹ Daniẹl, Hananaya, Mishẹl, kugbe Azaraya vwo aghwanre vrẹ emeshare ri chekọ na eje. Ọ da sane ayen ihwo ẹne na nẹ e wian vwẹ ọguan rọyen. Kọke kọke yen ovie na vwọ nokpẹn rẹ uchebro mie ayen siẹrẹ ọ da guọnọ brorhiẹn eghanghanre. Jihova da nẹrhẹ ayen vwo aghwanre vrẹ egbaghwanre rẹ ovie na kugbe ihwo ri ruẹ imajiki kẹ ejobi.

Dede nẹ Daniẹl, Hananaya, Mishẹl, kugbe Azaraya hẹ evunrẹ orere ọfa, ọ chọrọ ayen ẹro nẹ ayen idibo rẹ Jihova-a. Wọ jẹ cha karophiyọ Jihova ọ da tobọ dianẹ wọ hẹ asan rẹ ọsẹ vẹ oni wẹn hepha-a?