Nabucodonosoreʼ tu bisaj Babilonia u principeiloʼob Judá yéetel tu tsʼáajoʼob kanáantbil tumen Aspenaz, juntúul máax ku meyaj yiknal le reyoʼ. Nabucodonosoreʼ tu yaʼalaj xan tiʼ Aspenaz ka u kaxt le xiʼipalaloʼob maas tʼaʼajtakoʼob yéetel maas yaan u naʼatoʼob ichil tuláakal le principeʼoboʼ. Le xiʼipalaloʼobaʼ tres años kun kaʼansbiloʼob utiaʼal ka meyajnakoʼob tu palacio le reyoʼ. Kʼaʼabéet kaʼach u kanik u xokoʼob, u tsʼíibtoʼob yéetel u tʼankoʼob le idioma acadio ku tʼaʼanal kaʼach Babiloniaoʼ. Yaan xan u jaantkoʼob le janal ku tsʼaʼabal tiʼ le reyoʼ. Kantúul tiʼ le xiʼipalaloʼobaʼ ku kʼaabaʼtikoʼob Daniel, Hananías, Misael yéetel Azarías. Chéen baʼaleʼ Aspenazeʼ tu kʼexaj u kʼaabaʼob, tu tsʼáajtiʼob kʼaabaʼob suuk u tsʼaʼabal tiʼ le babilonioʼoboʼ: Beltsasar, Sadrac, Mesac yéetel Abednego. A tuklikeʼ, ¿yaan wa u náachtaloʼob tiʼ Jéeoba yoʼolal le kaʼansaj kun tsʼaabiltiʼoboʼ?

 Le kantúul xiʼipalaloʼobaʼ u kʼáat kaʼach u beetoʼob baʼax ku yaʼalik Jéeoba. U yojloʼob maʼ unaj u jaantkoʼob le janal kun tsʼaabiltiʼoboʼ tumen u Ley Jéeobaeʼ ku yaʼalik maʼ unaj u jaantaʼal jujunpʼéel tiʼ le baʼaxoʼob suuk u jaantik le reyoʼ. Le oʼolal tu yaʼaloʼob tiʼ Aspenaz: ‹Beet uts maʼ a tsʼáaiktoʼon le janal ku jaantik le reyoʼ›. Chéen baʼaleʼ Aspenazeʼ tu yaʼalajtiʼob: ‹Wa maʼ ta jaanleʼex maʼalob yéetel wa ku yilik le rey kʼojaʼan a wicheʼexeʼ, yaan u kíimsken›.

Daniel túuneʼ tu tuklaj baʼax jeʼel u beetkoʼobeʼ. Tu yaʼalaj tiʼ le máax kanáantkoʼoboʼ: ‹Tu yáamil 10 kʼiinoʼobeʼ beet uts a tsʼáaiktoʼon chéen verduraʼob yéetel jaʼ. Ken tsʼoʼokkeʼ ka ketkoʼon yéetel le uláakʼ xiʼipalaloʼob tu jaantoʼob le baʼax ku jaantik le reyoʼ›. Le máax kanáantkoʼoboʼ maʼalob tu yuʼubil leloʼ.

Ka máan 10 kʼiinoʼobeʼ, Daniel yéetel le u yóoxtúul u amigoʼoboʼ maas tʼaʼaj u yilaʼaloʼob ke le uláakʼ xiʼipalaloʼoboʼ. Jéeobaeʼ jach kiʼimakchaj u yóol tumen letiʼobeʼ tu yuʼuboʼob tʼaan. Jéeoba xaneʼ tu tsʼáaj tiʼ Daniel u páajtalil u tsolik baʼax u kʼáat u yaʼal le wayakʼoʼoboʼ.

Ka tsʼoʼok le tres años táan u kaʼansaʼaloʼoboʼ, Aspenazeʼ tu bisaj le xiʼipalaloʼob tu táan Nabucodonosoroʼ. Le reyoʼ tʼaanaj tu yéeteloʼobeʼ ka tu tsʼáaj cuenta maas yaan u naʼat Daniel, Hananías, Misael yéetel Azarías tiʼ le uláakʼ xiʼipalaloʼoboʼ. Le oʼolal tu yéeyoʼob utiaʼal ka meyajnakoʼob tu palacio. Ka tsʼoʼokeʼ le reyoʼ yaʼab u téenel tu kʼáatajtiʼob bix jeʼel u beetik jujunpʼéel baʼaloʼobeʼ. Jéeobaeʼ tu beetaj u maas yantal u naʼatoʼob ke tiʼ le j-meenoʼob yéetel le uláakʼ máaxoʼob áantik le reyoʼ.

Daniel, Hananías, Misael yéetel Azaríaseʼ kex táanxel luʼumil yanoʼobeʼ mix juntéen tu tuʼubsoʼob tiaʼanoʼob ichil u kaajal Jéeobaeʼ. Techeʼ, ¿yaan wa a beetik baʼax ku yaʼalik Jéeoba kex minaʼan a papaʼob ta wiknal?