Ho Nebukadenesara adi agu abazogo nga ga Yuda yo ni ku Babera yo, ko amoi gu banyaki nangia Asepeneza ko ningerefuo yo. Nebukadenesara aya fu Asepeneza ko gbata agu aparanga du na wene kpotoyo pongopongo na du na inohe dagba aYisaraere yo. Si adu nga i nika raba agu aparanga re tipa agarã biata. Gu rabahe re adu tipa ka undo yo i rẽ ka mangasunge ni nyanyakipa abanyaki Babera yo. Si aaida agu aparanga re wiriki wai ka gedapai na ka kepai, na ka pe pa aboro Babera nangia Akkadian. Si adu a nga i niri kina gu riahe bakindo arihe na gako aboro. Agu aparanga biama re angia Daniere, Ananya, Misaere, na Azaraya. Asepeneza afu vovo arimo fuyo nga ga aBabero: Beretesasara, Sadaraka, Mesaka, na Abedenego. Ya mo gi rabahe re arengbe ka sayo i mbu iriso Yekova?

 Agu aparanga biama re adiberã tipa ka giasangba Yekova. I aima ino gupai nga si aidanga i ri gu riahe nga ga bakindo te mbiko bete agu ariahe re ga Yekova aNdiko naya si ni bibiriko ho. Sidu, i aya fu Asepeneza: ‘Ako, ka mo sanga rani ani ri ga bakindo riahe ya.’ Asepeneza aya fuyo: ‘Ka oni aringa ha ya na bakindo ki bi gupai nga oni nakoba be gomoro, ko nika imo re!’

Daniere adu na gu kura berãpai. Ko aya fu gu boro naangerafuo yo: ‘Ako gbia, mo fu kina kpepasio furani na ime tipa arame bawe. Fuani, mo ki wisigi rani na gu paranga aboro nari ga bakindo riahe.’ Bangerekurii yo ki idihe.

Fuo ko asadi yo tipa aˈuru bawe, Daniere na abakureako aangera na wene kpotoyo kisusi gu kura paranga aboro. Yekova adu na ngbarago nga i aima giasangbako. Ko afu tatamana fu Daniere ko nirugu tiko na pa amosumo.

Ho gu rabahe re anyasi ni, Asepeneza aye na gu paranga aboro re fu Nebukadenesara. Bakindo afura na yo na ki bi gupai nga Daniere, Ananya, Misaere, na Azaraya aima du na inohe kisusi gu kura paranga aboro dunduko. Ko asia yo biama i nimangisunge fuo ko ngbanga yo. Bakindo anaasana yo dedede i fu berãpai fuko ho ko aida ka manga nyanyakipa diaberã ni. Yekova asa yo i du na tatamana kisusi ga bakindo aboro tatamana dũ na abinza.

Wa aDaniere, Ananya, Misaere, na Azaraya avura du rogo gu kura ringara kia, bangiriyo aagonga ti gupai nga, ga Yekova aboro nangia yo te. Ya mo mo a atingidapa Yekova na aregbo dũ, zavura ho adunga avunguro ni ya?