I nge kare ma Kabaka Nebukadnejar oleko lek i kom cal madit ca, en otiyo cal mo me jabu. En ocibo ocung i bar me Dura ci olwongo jo ducu ma gitye ki rwom i lobo Babilon, kadiwa Cadrak, Mecak, ki Abednego, me gure i nyim cal-li. Kabaka ociko ni: ‘Cutcut ka wuwinyo bila, opuk, nyamulere ki jami goyo wer mukene, myero wuryebbe piny wuwor cal man! Ngat mo ma pe biryebbe piny ka woro cal lubanga man, kibibole i keno malyet ma lyel mac.’ Luibru adek-ki tika guryebbe piny ka woro cal-li, nyo guworo Jehovah keken?

Kabaka ociko ni kigo wer. Dano ducu guryebbe piny guworo cal lubanga-ni nikwanyo Cadrak, Mecak, ki Abednego. Jo mogo guneno gin mutimme ci gudoto bot kabaka ni: ‘Jo Ibru adek magi gukwero woro cal lubanga ma itiyo-ni.’ Nebukadnejar oweko kikelogi bote ci owaccigi ni: ‘Abimiyo botwu kare mukene me woro cal lubanga-ni. Ka pe wuryebbe, abibolowu woko i keno malyet ma lyel mac. Pe tye lubanga mo ma bilarowu ki i cinga.’ Gugamo ni: ‘Pe wamito ni imiwa kare mukene. Lubangawa twero larowa. Ento kadi bed en pe olarowa, Ai kabaka, wan pe wabiworo cal lubanga ma itiyo-ni.’

Akemo mager omako Nebukadnejar woko. En owaco bot jone ni: ‘Med mac olyetti tyen abiro makato kit ma onongo lyet kwede-ni!’ Ci en ociko lumonye ni: ‘Wutwe joni woko, ci wubolgi i mac!’ Mac-ci onongo dong lyet mukato kare woko mumiyo i kare ma lumony gubino cok ka bolo jo adek-ki iye,  guto woko cutcut. Luibru adek-ki gupoto wa i dye mac. Ento lacen ma Nebukadnejar oneno i keno, oneno jo angwen ma gitye ka wot i dye mac me kaka dano adek. Lworo omako kabaka ci openyo lumi tamme ni: ‘Pe wabolo jo adek i mac? Atye ka neno jo angwen, dok dano me angwenne nen calo lamalaika!’

Nebukadnejar onyiko cok ki doggola me kabedo ma mac tye ka lyel iye-ni ci odange ni: ‘Wukatti woko, wun lutic pa Lubanga Mamalo Twal!’ Dano ducu gubedo ki ur me neno Cadrak, Mecak, ki Abednego ka gikatti woko ki i mac ma mac pe owango komgi. Mac pe owango del komgi, yer wigi, nyo bongigi, dok ngwec mac bene pe i komgi.

Nebukadnejar owaco ni: ‘Lubanga pa Cadrak, Mecak, ki Abednego dit ma lapore pe. En ocwalo malaikane ci olarogi. Pe tye lubanga mo mukene ma pore kwede.’

Calo Luibru adek-ki, in dong imoko tammi me bedo lagen bot Jehovah kadi bed meno keto kwoni ka mading?