Nindo moko i ng’ei m’ubimo Nebukadnezar uleko lek mir ayi gin m’acwia, egam eyiko ayi gin m’acwia ma dit mi mola ma kwar. Ekethe ecungo i pambu mi Dura man elwong’o dhanu ma pol ma pigi tek mi ng’om pare, uketho i ie Cadrak, Mecak, Abed-nego man ecokogi karacelo i wang’ ayi gin m’acwiane. E ubimo ung’olo kumae: ‘Tek wubiwinjo dwand agwara kud adungu man usegu; wupodh piny ni ayi gin m’acwia! Ng’atu ma tek bipodho ngo piny, jubibole i maj ukaa m’ubogere.’ Nyo Juyahudi adek maeno de gibirum ni ayi gin m’acwia, kunoke nyo gibiworo migi Yehova kende?

I ng’eye, ubimo ugam ung’olo nia jugoi mizik. Dhanu ceke ugam upodho piny man girwo ni ayi gin m’acwia, ento Cadrak, Mecak man Abed-nego gikwero nirum. Jumoko m’i kind dhanu unenogi man gidwoko ni ubimo kumae: ‘Juyahudi adek maeni gikwero nirwo ni ayi gin m’acwia peri.’ Nebukadnezar ugam uoro jucidh jugamugi man ewacu igi kumae: ‘Abemio iwu kendo kaka mange mi rwo ni ayi gin m’acwia. Kan wukwero, abibolowu i maj ukaa. E mungu moko mbe ma bibodhowu kud i cinga.’ Gidwoko ire kumae: ‘Wabemito ngo imii iwa kaka mange. Mungu mwa copo bodhowa. Ento kadok nwang’u ebodhwa ngo de, e ubimo wabirwo ngo ni ayi gin m’acwia.’

Kwinyo umaku Nebukadnezar ma rac mandha. Egam eyero ni dhanu pare kumae: ‘Wuketh maj ukaa ubogere ma lieth wang’ abiro ma sagu ma naka!’ I ng’eye, eng’olo ni juaskari pare kumae: ‘Wutwii  dhanu maeni man wubolgi i mac!’ Maj ukaa maeno ubino lieth akeca uketho kinde ma juaskari gicoro ceng’ini i kume, githo wang’ acel. Juyahudi adek maeno gipodho i die mac. Ento kinde ma Nebukadnezar ucidh ukemogi, eneno dhanu udoko ang’wen m’ubewotho i die mac m’ubogere. E ndiri gam ung’oi i ie uketho epenjo jutic pare kumae: ‘Ve wabolo dhanu adek i mac do? Re abeneno dhanu ang’wen man acel m’i kindgi ubenen ve malaika!’

Nebukadnezar ucoro ceng’ini i kum odi mac man ekok kumae: ‘Wuwok woko, wujutic pa Mungu ma malu ngbir!’ Pieno, dhanu ceke igi wang’ lii nineno Cadrak, Mecak man Abed-nego gibewok kud i mac ma gin m’utimogi mbe acel de. Kumgi, yukwigi man bongu migi de uwang’ ungo, kadok ng’wic mac de ung’wi ngo i kumgi.

Nebukadnezar ugam uyero kumae: ‘Mungu pa Cadrak, Mecak man Abed-nego etie Mungu ma dwong’. Eoro malaika pare ubin ubodhogi man mungu moko mbe ma calu Mungu migi.’

Calu awobi adek mi Yuda, nyo in de ikeco nigwoko bedoleng’ peri ni Yehova kadok nwang’u lembang’o m’uwok de?