Nabucodonosor reyejj mä estatuampi samkaskäna uka qhepatjja, mä jachʼa ídolo qorit lurayäna. Dura sat pamparuw ucharakïna. Ukarusti taqpach yäqat jaqenakaruw tantachthapïna. Sadrac, Mesac, Abednego waynanakarus jawsayarakïnwa. Reyisti akham sänwa: ‘Kunapachatejj jumanakajj trompetan phustʼasitapa, arpa, gaita sat instrumentonakan tuktʼasitap istʼapjjäta ukhajja, taqeniw oraqer puriñkam altʼasipjjañama. Khititï jan munkani ukajj parintat hornor jaqontatäniwa’ sasa. ¿Kimsa hebreo waynanakajj uka idolor adorapjjpachänti, jan ukajj Jehová Diosarukich adorapjjpachäna?

Reyejj music tuktʼasiñap mayïna ukhajja, taqe jaqenakaw estatua nayraqatan qonqortʼasisajj adorapjjäna. Sadrac, Mesac, Abednego waynanakakiw jan adorapkänti. Uk amuyasajj yaqhepajj akham sasaw reyir sapjjäna: ‘Aka kimsa hebreonakajj janiw estatuamar adorapkiti’ sasa. Nabucodonosor reyejj uka kimsa waynanakar jawsayasajj akham sänwa: ‘Estatuar adorapjjañamatakejj aka mä kutimpi mayipjjäma, janitï adorapkätajja hornoruw jaqontapjjäma. Janiw kuna diosas nayan amparajat salvapkätamti’ sasa. Jupanakajj sapjjänwa: ‘Mayampi mayipkitäta ukhas janiw adorapkäti. Diosajaw nanakar salvasipkitani. Janis salvapkchitanejja, janipuniw uka estatuar adorapkäti’ sasa.

Nabucodonosor reyejj wal colerasïna. Servirinakapar akham sänwa: ‘¡Qhawqhatï hornojj parintayañäki ukat sipansa, paqallq kutimpi parintayapjjam!’ sasa. Ukatjja soldadonakapar akham sänwa: ‘Aka  jaqenakar ñachʼantasin hornor jaqontanipjjam’ sasa. Kimspachaniruw hornor jaqontapjjäna. Hornojj wali paripunïnwa, ukar jakʼachasir soldadonakas jiwarapjjänwa. Nabucodonosor reyejj hornor uñtäna ukhajja, pusiniruw sarnaqaskiri uñjäna. Walpun sustjasïna, yanapirinakaparus akham jisktʼäna: ‘¿Janit kimsaniru jaqontktanjja? Nayajj pusiniruw uñjta, ¡maynejj mä angeläkaspas ukhamawa!’ sasa.

Nabucodonosor reyejj jukʼamp hornor jakʼachasisajj akham sasaw artʼäna: ‘¡Alajjpachankir Diosan servirinakapa, mistunjjapjjam!’ sasa. Sadrac, Mesac, Abednego waynanakajj jan kuna kamachtʼat mistunipjjäna ukhajja, taqeniw wal musparapjjäna. Janiw jañchipasa, ni ñikʼutapasa, ni isipas nakharatäkänti, janirakiw nina ninas thujskänti.

Nabucodonosor reyejj akham sänwa: ‘Sadrac, Mesac, Abednego waynanakan Diosapajj wali jachʼawa. Angelap khitanisaw jupanakar salvawayi. Janiw yaqha diosajj jupjamajj utjkiti’ sasa.

¿Janit jumajj uka kimsa hebreonakjama, kunas pasaskpan, Jehová Diosaruk serviñ munkasma?