Mbus eem yé i ôñgba, Kiñe Nébukadnézar a uñgus soso ôñgba i gôl. A téé yo i tegep mbok le Dura, a sébél bañga bôt ba loñ le ba kodba bisu bi ôñgba; Sadrak, Mésak bo Abed-négô ba bé i nsoñgi u bôt ba. Kiñe i ti oda le: ‘Ndik kii n’a nok ba nhem sép, diluñ di banganda ba-na, ni ñada dikos, ni ôôp bisu bi ôñgba! Nu ni nu a’ ôôp bé a’ léña ikété bup hiuu.’ Ndi baa, bana bon baa ba Lôk Héber ba ga ôôp bisu bi ôñgba, tole ba ga bégés ndigi Yéhôva?

Ha nyen kiñe i bi ti ni oda le ba leñ nsik. Bôt bobasôna ba ôôp i bégés ôñgba, he bes Sadrak, Mésak, ni Abed-négô. Ngim bôt i yimbe bañ hala, i kal kiñe le: ‘Bana bon ba Lôk Héber bobaa ba ntop bé bégés ôñgba yoñ.’ Nébukadnézar a om le ba sébél bo, a kal bo le: ‘Me noode néhne bé njel ipe i bégés ôñgba. Ibale ni mbégés bé yo, me ga leñ bé i hié. Ngim djob i ta bé, i i ga péyés bé i moo mem.’ Ba timbhe nye le: ‘Di gwé bé ngôñ le u néhne bés njel ipe. Djob jés li nla péyés bés. Ndi to ibale a mboñ bé hala, a kiñe, d’a bégés bé ôñgba.’

Nébukadnézar a unup ngandak. A kal bôt bé le: ‘Ni lôñôs bup hiuu ngélé isaambok iloo kii ba mbéna lôñôs yo!’ Ndi a ti bisônda gwé oda le: ‘Ni  kañ i bôt bana, ni leñ bo ikété hié!’ Hié hi bééna ngui ngandak kayéle, ngéda bisônda bi bi tiige hio bebee, hi nol bo ngélé yada. Bon baa ba Lôk Héber ba kwo ikété hié. Ndi Nébukadnézar a yé a béñgege bañ, iloo le a tehe bôt baa, a tehe bôt ba-na ba nke ikété hié. A sehla, a bat bôt bé le: ‘Bôt baa bé bon ni leñ ikété hié? Me ntehe bôt ba-na, ndi wada ikété yap a yé kiki bo añgel!’

Nébukadnézar a bi tiige bebee ni hié, a sébél: ‘Pama, a bagwélél ba Nyambe Nungingii!’ Bôt bobasôna ba hel kiki ba ntehe le Sadrak, Mésak, ni Abed-négô ba mpam i hié ndi ba lék bé. Manyuu map, tjôñ tjap, ni mambot map ma bi lék bé, ndi to njiñ hida, ma bé numb bé.

Nébukadnézar a kal le: ‘Djob li Sadrak, Mésak, ni Abed-négô li yé likeñi. A ñom añgel yé i tohol bo. Ngim djob yo ki yo i ta bé kiki Djob jap.’

Kiki bon baa ba Lôk Héber, baa yak we u ga téñbe i gwélél Yéhôva, tokii i mpémél we?