Ilyo papitile inshita ukutula apo imfumu Nebukadnesari yalotele iciloto ca cimpashanya, yapangile icimpashanya icikalamba ica golde. Lyena Nebukadnesari aciimike mwi lungu lya Dura kabili aitile abantu abali abacindama mu calo, ukubikako fye na Shadraki, Meshaki na Abednego ukwiminina pa ntanshi ya cimpashanya. Imfumu yaebele abantu ati: ‘Nga mwaumfwa amapenga, insango ne cimpeeta ca nyambi fyalila, muwe pa nshi no kupepa icimpashanya! Uushawe pa nshi balamupoosa mwi lungu lya mulilo uulebilima.’ Bushe abaHebere batatu bali no kupepa icimpashanya nelyo bali no kulapepa fye Yehova?

Lyena imfumu yaebele abakulisha inyimbo ukuti balishe. Abantu bonse baliwile pa nshi no kupepa icimpashanya, lelo Shadraki, Meshaki na Abednego bena tabawileko. Abantu bamo balibamwene kabili baebele imfumu ati: ‘Balya abaHebere batatu tabapepeleko icimpashanya cenu.’ E ico Nebukadnesari atumine abakuyabeta kabili aishilebeba ati: ‘Uno muku nga mwaumfwa ifilimba fyalila muwe pa nshi no kupepa icimpashanya. Nga tamwacipepe, nalamupoosa mu mulilo. Takuli lesa uwalamupokolola kuli ine.’ Bayaswike imfumu ati: ‘Tatwapepe ici cimpashanya. Lesa wesu kuti atupususha. Lelo nangu tatupusushe, tatwapepeko icimpashanya mwe mfumu.’

Nebukadnesari alifulilwe sana. E ico aebele abaume bakwe ati: ‘Kosheni umulilo mwi lungu kabili mulikafye imiku 7 ukucila ifyo likaba lyonse!’ Lyena aebele  abashilika bakwe ati: ‘Kakeni aba bantu kabili bapooseni mu mulilo!’ Ilungu lyalikabile sana ica kuti ilyo abashilika bapalemeko, balifwile apo pene fye. AbaHebere batatu balibapoosele mu mulilo. Lelo ilyo Nebukadnesari aloleshe mwi lungu, amwene abaume bane baleenda mu mulilo. Alyumfwile umwenso kabili aipwishe bacilolo bakwe ati: ‘Bushe tatwacipoosa abantu batatu mu mulilo? Ndemona abantu bane, kabili umo alemoneka kwati ni malaika!’

Nebukadnesari alipaleme kwi lungu lya mulilo kabili abilikishe ati: ‘Fumeni mwe babomfi ba kwa Lesa Uwapulishamo!’ Abantu bonse balipapile ilyo bamwene Shadraki, Meshaki na Abednego bafuma mu mulilo ukwabula ukupya. Inkanda yabo, umushishi wabo e lyo na ifya kufwala fyabo tafyapiile kabili tabalenunka no mulilo nangu panono.

Lyena Nebukadnesari alandile ati: ‘Lesa wa kwa Shadraki, Meshaki na Abednego mukalamba. Acituma malaika wakwe ku kupususha aba bantu. Takwaba lesa uwaba nga Lesa uwa aba bantu.’

Nga filya abaHebere batatu bacitile, bushe na iwe ulafwaisha ukulapepa fye Yehova te mulandu ne fingacitika?