Bas sada wari, kenca idat Raja Nebukadnesar nipi kerna sada patung, ibanna me sada patung si galang bas emas nari. Patung e ibangunna i daerah Dura janah ipepulungna kerina pejabat-pejabat penting bas negeri e termasuk Saderah, Mesah, ras Abednego, gelah cinder i lebe-lebe patung e. Nce, ibereken raja perentah nina, ‘Adi ibegi kena sora terompet, harpa, ras seruling, mis sembah kena patung e! Ise si la nggit pasti iambekken ku bas api si gurlah.’ Nggit nge telu kalak Heber e nembah patung, ntah Jahwe ngenca si isembahna?

Kenca si e, iperentahken raja gelah imulai musik e. Kerina kalak nembah man patung e, tapi Saderah, Mesah, ras Abednego la nggit. Lit si ngidahsa, nce nina man raja, ‘Telu kalak Heber e la nggit nembah patung si ibanndu.’ Emaka, ilebuh Nebukadnesar kalak e, nina, ‘Kubereken kena kesempaten guna nembah man patung e. Adi la kena nggit, iambekken me kena ku api si gara. Labo lit Dibata si banci nelamatken kena arah aku.’ Nina kalak e, ‘La padah iberendu kami kesempaten. Banci nge kami iselamatken Dibata kami. Tapi amin pe la iselamatkenNa kami, ndigan pe labo kami nggit nembah patung e.’

Merawa kel Nebukadnesar. Emaka isuruhna pegawaina, ‘Ban api e pitu kali lipat lasna asangken biasana!’ Kenca e, iperentahkenna tenterana, ‘Iket kalak e ras ambekken ku bas api!’ Ban lasna api e, tentera si maba kalak e mate sanga ndeher ku api. Ndabuh me telu kalak Heber e ku bas api e. Tapi sanga inen Nebukadnesar ku bas api e, idahna lit empat kalak si sangana erdalan-dalan i je labo telu kalak. Mbiar me raja janah nina man pegawaina, ‘Me telu kalak ndai si ambekken kena ku api? Ngkai maka empat si kuidah, janah lit sekalak si bagi malekat!

Ideheri Nebukadnesar ingan api si gurlah e janah nina erlebuh, ‘Ndaratlah, suruh-suruhen Dibata Si Meganjangna!’ Kerina kalak sengget sanga Saderah, Mesah, ras Abednego ndarat arah api e perban idahna kalak e la kaden pe. Kulitna, bukna, ras uisna la lit si meseng janah bau asap pe la lit bas kalak e.

Nina Nebukadnesar, ‘Luar biasa kel Dibata si Saderah, Mesah, ras Abednego. IsuruhNa malekatNa nelamatken kalak e. La lit si seri bagi Dibata kalak e.’

Bagi telu kalak Heber e, tetap nge kam setia man Jahwe la soal kai si terjadi?