Átiri dan lárigiñe gewenedü lani urúei Nabukodonosoru guáriua, aba ladügagüdün aban óunwenbu guáriua lauti golu. Ábati líchuguni lidan fulasu mawübüriti le gíribei Dura. Aba ladügün lun hóundaragun gürigia ha súdinibaña lageira ligibugiñe guáriua ligía, Sadürákü, Mesakü luma Awedi-negó haganagua. Ábati líchuguni urúei gumadi le: “Danme haganbuni tumalali sun tuwuyeri fidu tuma árüpa, ábame háhuduragun lun guáriua! Le máhuduragunti lun guáriua ladarúba lidoun aban régigi durunguti”. Háhuduraguba funa san ǘrüwa huríu ha lun guáriua o lúnrügüba Heowá háhuduragua? Ka bisaminanbei?

Ábati líchugun urúei gumadi lun lafarúniwa músika. Aba háhuduragun sun gürigia lun guáriua, ánheinti Sadürákü, Mesakü luma Awedi-negó máhuduraguntiña. Ñǘdüntiña fiu wügüriña ha arihibaliña ariñaga lun urúei: “Máhatiña ǘrüwa huríu ha háhuduragun lun guáriua le badügübei”. Aba lóunahan Nabukodonosoru agúara houn, ábati lariñagun: “Níchiga ábanya chansi hun lun háhuduragun lun guáriua. Anhein madügün humá, nadügüba lun hagurúniwa lidoun régigi le durunguti. Úabei bungiu gayaraati lesefurunün nuéi”. Aba hóunabun: “Memegeiruntiwa amu chansi. Gayaraati lesefuruniwa Wabungiute. Ani íbini anhein madügün lan, subudiléi urúei buidu, máhuduragunbadiwa lan lun guáriua le ladügübei”.

Aba lagañidun Nabukodonosoru saragu. Lariñagati houn lubúeingu: “Sǘgüda huméi régigi sedü wéiyaasu sügǘ láuñaha lisü!”. Ábati lariñagun houn lisudaranigu: “Güragua humaña wügüriña ha, fui humaña lidoun!”.  Wéiriti lisü régigi ligía darí lun hóunwegun súdaragu hagía dan le hayarafadunbei luagun. Héiguatiña ǘrüwagubei huríu lidoun watu. Lárigiñe, dan larihinbei Nabukodonosoru lidoun régigi durunguti, mámarügüñanu ǘrüwa wügüriña lariha, gádürüñanu larihin éibuga lidan. Ábati lanufudedagun saragu, aba lálügüdüniña lisudaranigu: “Ma san ǘrüwañanu wügüriña wádarun lidoun watu? Ariha humá! Gádürüñanu narihin lidan ani lenege aban ánheli le hagadürün!”.

Ábatima layarafadun Nabukodonosoru luagun régigi, aba lagúaragun: “Lubúeingu Bungiu le Íñutimabei furí humá ñéingiñe!”. Wéiritu hanigi súngubei dan harihini Sadürákü, Mesakü luma Awedi-negó áfurida éibugeina lídangiñe watu masuseredunga ni kata houn. Machurarunti hara, hádiburi ni hadaüragun, méhemengubeiti watu hau.

Lariñaga Nabukodonosoru: “Wéiriti lubuidun Lubungiute Sadürákü, Mesakü luma Awedi-negó. Óunaha lumuti lani ánheli esefuraña. Úati amu bungiu kei Habungiute”.

Úaraguabadibu san lun Heowá meberesenga le asusereduti, kei meha hadügüni ǘrüwa ebüréugu ha?