LEKSIYON 61
Wala Sila Moyukbo
Human magdamgo si Haring Nabucodonosor bahin sa dakong estatuwa, naghimo siyag dakong estatuwa nga bulawan didto sa kapatagan sa Dura. Iyang gipaadto didto ang iladong mga tawo, apil si Sadrak, Mesak, ug Abednego. Miingon ang hari: ‘Inigkadungog ninyo sa tingog sa mga trompeta, alpa, ug sa uban pang instrumento, yukboi ninyo ang estatuwa! Kadtong dili moyukbo ilabay sa kalayo.’ Moyukbo kaha ang tulo ka Hebreohanon, o si Jehova lang ang ilang simbahon?
Dayon ang hari nagsugo nga patugtogon na ang musika. Miyukbo ang tanan ug misimba sa estatuwa, gawas kang Sadrak, Mesak, ug Abednego. Nakit-an sila sa uban ug gisultihan nila ang hari: ‘Wala mosimba sa estatuwa ang tulo ka Hebreohanon.’ Gipatawag sila ni Nabucodonosor ug giingnan: ‘Tagaan ta mog usa pa ka higayon. Simbaha ninyo ang estatuwa kay kon dili, ilabay ta mo sa kalayo. Walay diyos nga makaluwas ninyo.’ Mitubag sila: ‘Dili na mi kinahanglang tagaan pag laing higayon. Kaya ming luwason sa among Diyos. Pero mahal nga hari, bisag dili mi niya luwason dili gyod mi mosimba sa estatuwa.’
Nasuko pag-ayo ang hari. Giingnan niya ang mga sundalo: ‘Painita ninyog pito ka pilo ang kalayo! Gaposa ninyo kining mga tawhana, ug ilabay sila didto!’ Tungod sa kainit sa kalayo, namatay ang mga sundalo dihang ilang gilabay didto ang tulo ka Hebreohanon. Pero pagtan-aw ni Nabucodonosor, upat ka tawo ang nakita niya sa kalayo. Puwerte niyang hadloka ug iyang gipangutana ang mga opisyal: ‘Dili ba tulo ra ang atong gilabay sa kalayo? Upat na lagi sila, ug ang usa nila morag anghel!’
Miduol si Nabucodonosor ug miingon: ‘Gawas mo diha, mga alagad sa Labing Gamhanang Diyos!’ Nakurat ang tanan paggawas ni Sadrak, Mesak, ug Abednego kay wala sila maunsa. Wala masunog ilang panit, buhok, ug sinina, ug wala gani sila manimahong sunog.
Si Nabucodonosor miingon: ‘Gamhanan gyod ang Diyos ni Sadrak, Mesak, ug Abednego. Gipadala niya ang iyang anghel aron luwason sila. Wala gyoy makalupig sa ilang Diyos.’
Bisag unsay mahitabo, determinado ba kang magmaunongon kang Jehova sama sa tulo ka Hebreohanon?
“Si Jehova nga imong Diyos ang angay nimong simbahon, ug siya lamang ang angay nimong hatagag sagradong pag-alagad.”—Mateo 4:10
Basin Ganahan Pod Ka
PAGTUON SA BIBLIYA
Naluwas Gikan sa Nagkalayong Hudno!
Sayra ang kahinungdanon sa pagbarog sa imong gituohan.
TUBAG SA MGA PANGUTANA BAHIN SA BIBLIYA
Angay Ba Kitang Mosimba sa mga Imahen?
Unsay bation sa Diyos kon mogamit kitag mga imahen o idolo sa atong pagsimba?
