WASE 61
Ratou Sega ni Cuva
Oti vakalailai nona tadra na matakau o Tui Nepukanesa, e bulia sara e dua na matakau koula levu. E vakaduria ena buca o Tura qai kacivi ira mai na tamata rogo ena vanua ya mera duri ena mata ni matakau, wili kina o Setareki, Mesake, kei Apeteniko. E vakarota na tui: ‘Na gauna ga oni rogoca kina na biukila, api, kei na pakipaipi, ni cuva ena matakau! O koya e sega ni cuva, ena biu ena lovo bukawaqa. Vakacava eratou na cuva na tolu na Iperiu, se ratou na sokaloutaki Jiova ga?’
E qai vakarota na tui me vakarogoi na ivakatagi. Era cuva kece mera sokalou ina matakau, vakavo ga o Setareki, Mesake, kei Apeteniko. Era raici ratou yani e vica, era lai vakatukutuku sara vua na tui: ‘Ratou bese ni cuva ina matakau na tolu na Iperiu.’ E kaya o Nepukanesa me ratou kau yani qai tukuna: ‘Qo na iotioti ni gauna mo dou cuva kina ena matakau. Ke sega, au na biuti kemudou ina lovo bukawaqa. Ena sega ni vakabulai kemudou e dua na kalou.’ Ratou kaya: ‘Ena sega ni veisau na neitou vakatulewa. E rawa ni vakabulai keitou na neitou Kalou. Ia ke sega kemuni na tui, keitou na sega ni cuva ina matakau.’
Dua na ka nona cudru o Nepukanesa. E tukuna vei ira nona tamata: ‘Me vakavitutaki na katakata ni lovo!’ E qai vakaroti ira nona sotia: ‘Vesuki ratou na tagane qo me ratou biu ina lovo!’ Dua na ka na katakata ni lovo. Ratou mate mada ga na sotia ni ratou volekata yani. Ratou lutu ina lovo bukawaqa na tolu na Iperiu. Ia ni rai yani o Nepukanesa, e raica ni ratou veilakoyaki tiko e loma e va na tagane, sa sega ni tolu. Dua na ka nona domobula, e tarogi ira nona vakailesilesi: ‘A sega ni tolu ga eda biuta i loma? Au raica e 4, e dua e vaka na agilosi!’
E toso voleka ina lovo o Nepukanesa qai kailavaka: ‘Dou lako mai tuba na tamata ni Kalou Cecere Duadua!’ Era qoroqoro kece ni ratou sa lako mai tuba o Setareki, Mesake, kei Apeteniko. E sega ni kama na yagodratou, drauniuludratou, kei na nodratou isulu, eratou sega mada ga ni boikamakama.
E kaya o Nepukanesa: ‘E cecere ga na Kalou nei Setareki, Mesake, kei Apeteniko. E tala mai nona agilosi me vakabulai ratou. E sega ni dua na kalou e tautauvata kei na nodratou Kalou.’
Se mani cava e yaco, o vakadeitaka mo yalodina vei Jiova me vakataki ratou na tolu na Iperiu?
“E dodonu mo sokalou vei Jiova na nomu Kalou, me vakatabakidua vua na nomu veiqaravi tabu.”—Maciu 4:10
Rawa ni o Wilika Tale ga
LESONI NI VULI IVOLATABU
Vakabulai Mai na Lovo Bukawaqa!
Vulica na bibi ni nomu tutaka na ka o vakabauta.
SAUMI NA TARO VAKAIVOLATABU
E Dodonu Meda Sokaloutaka na Matakau?
Vakacava ena kauai na Kalou ke da vakayagataka na matakau se ivakatakarakara ena noda sokalou?
