Sit de König Nebukadnezar de Traum gha het, isch scho es Ziitli vergange. Jetzt macht er e riisigi goldigi Statue und stellt si i de Ebeni vo Dura uf. Alli wichtige Männer vom Land sölled sich dört versammle und dezue ghöred au de Schadrach, de Meschach und de Abednego. De König befihlt: «I dem Moment, wo ihr d Trompete, d Harfe und d Dudelsäck ghöred spile, müend ihr euch vor de Statue verbüge! Wer sich nid verbügt, wird in en Ofe inegheit und verbrennt.» Was meinsch, verbüged sich echt di drü Hebräer oder bliibed si Jehova treu?

De König git de Befehl, dass d Musig söll afange spile. Alli verbüged sich und beted d Statue a, nume de Schadrach, de Meschach und de Abednego nid. Es paar Männer gsehnd das und säged zum König: «Di drü Hebräer tüend dini Statue nid abete.» De Nebukadnezar laat di drü zu sich hole und seit zu ihne: «Ich gib euch no ei Chance, d Statue azbete. Wenn ihr das wider nid mached, laa ich euch in Ofe gheie. Kei Gott cha euch vor mir rette.» Die drü gebed ihm zur Antwort: «Mir bruched nid nomal e Chance. Üse Gott cha üs rette. Aber au wenn er das nid macht, werded mir d Statue nid abete, o König.»

Da wird de Nebukadnezar richtig verruckt und seit: «Heized de Ofe no sibe Mal meh i als suscht!» Nachher befihlt er sine Soldate: «Fessled die Männer und gheied si ine!» De Ofe isch eso heiss, dass d Soldate sofort sterbed, wo si i d Nöchi chömmed. Di drü Hebräer gheied is Füür. Aber wo de Nebukadnezar in Ofe ineluegt, gseht er nid nume drü, sondern vier Männer im Füür. Da verschrickt er und fragt sini Beamte: «Hend mir nid nume drü Männer is Füür gheit? Ich gseh aber vier, und eine devo gseht us wie en Engel!»

De Nebukadnezar gaht nöcher zum Ofe here und rüeft: «Chömmed use, ihr Diener vom höchschte Gott!» Si stuuned, wo de Schadrach, de Meschach und de Abednego us em Füür usechömmed. Di drü sind überhaupt nid verletzt. Ihri Huut, ihri Haar und ihri Chleider sind nid verbrennt und si schmöcked nid emal nach Rauch.

De Nebukadnezar seit: «De Gott vom Schadrach, vom Meschach und vom Abednego isch würklich mächtig. Er het sin Engel gschickt und het si grettet. Es git kei Gott, wo eso isch wie er.»

Möchtisch du Jehova au immer eso treu bliibe wie di drü Hebräer – ganz egal, was passiert?