Maʼaka jeʼra kaʼi süchikijee nüʼlapüjaain Nabucodonosor, nukumajirüin wanee ayaakuaa miyoʼu aainjuushii süka ooro. Nukumajirüin shia saaʼu tü patajatshii chajatkat Dura otta nuutkajeʼeraka napüshuaʼa na wayuu kojutukana atumawaa. Eejana naʼaka naya wayuukana Sadrac, Mesac otta Abednego. «Jaapapa shiʼira tü trompetakat, tü arpakat otta tü gaitakat, jüsapainkainjana jia sünain aʼwaajaa tü ayaakuaakat. Niyoutule naaʼinrüin tia wanee wayuu, ojutuneechi saʼaka tü sikikat», nümaka chi aluwataaikai. ¿Nasapainkeenache na apünüinshiikana jimaʼalii? ¿Ayateeiche niain Jeʼwaa naʼwaajüin?

Shiʼyalajinnapa tü trompetakat, tü arpakat otta tü gaitakat, nasapainkashii na wayuukana sünain aʼwaajaa tü ayaakuaakat. Nayaʼala neʼe Sadrac, Mesac otta Abednego nnojoliikana nasapainkain sünain aʼwaajaa tia ayaakuaakat. Neʼrapa tia na waneinnua, namaka nümüin chi aluwataaikai: «Eeshii apünüinshii jimaʼalii hebreo nnojoliikana nasapainkain sünain aʼwaajaa tü ayaakuaakat». Naapapa tia Nabucodonosor, neenajiraka na jimaʼaliikana. «Tamüshii paala jia, shia anaka aluʼu jüsapainkale jia sünain aʼwaajaa tü ayaakuaakat. Nnojorüle jaaʼinrüin tia, tojutireena jia saʼaka tü sikikat. Nnojoleechi eein wanee maleiwa eekai nükaaliinjain jia», nümaka namüin. Nasoutaka nümüin: «Nnojoleerü waaʼinrüin tia. Nükaaliinjeena waya chi Wamaleiwasekai. Jaʼitakajaʼa nnojoliire nükaaliinjain waya, anasü pütüjaale saaʼu aluwataashikalee nnojoleenain wasapainkain waya sünain aʼwaajaa tü ayaakuaakat».

Jashichishi maʼin Nabucodonosor saaliijee tia. «Jiʼitaa sooʼomüin sukua tü sikikat süpüla jaʼishaatainjatüin shia», nümaka namüin waneinnua aʼyataalii nümüin. Nümaka  namüin na nusurulaatsekana: «Jijittaa wayuukana naainua jee jujuta naya saʼaka tü sikikat». Wanaa sümaa narütkaain sünainmüin, outushii na surulaatkana sutuma saaʼayula tü sikikat. Ojutunushii na apünüinshiikana hebreo saʼaka tü sikikat. Niirakaapa Nabucodonosor saʼaka tü sikikat, ayoʼujaasü naaʼin süka niʼrüin pienchishii wayuu. «¿Mataashii nojutunaka apünüinshii wayuu saʼaka tü sikikat? ¿Jamaka teʼraka pienchishii wayuu? Teʼrüin wanee wayuu müshi aka naaʼin wanee aapiee nümaʼanajeejachi Maleiwa», nümaka Nabucodonosor.

Nürütkaaka Nabucodonosor peje sünain tü sikikat sünain maa: «Jujuʼita, jiakana aʼyataaliikana nümüin chi Maleiwa Miyoʼushikai». Ponusü maʼin saaʼin tü wayuukalüirua neʼrapa nujuʼitüin Sadrac, Mesac otta Abednego saʼakajee tü sikikat. Nnojoishii jamajüin naya sutuma, nnojotsü jotuin nasheʼin otta nnojoishii sikamüsaleemain naya.

«¡Pülashi maʼin chi Nümaleiwasekai Sadrac, Mesac otta Abednego! Nuluwataain chi aapieekai süpüla naaʼinmajüin naya. Nnojoishi eein wane maleiwa maʼaka naaʼin chi Namaleiwasekai», nümaka Nabucodonosor.

Neʼitaain suluʼu naaʼin na jimaʼaliikana noonooinjanain waneepia nümaa Jeʼwaa, jaʼitairü kasain alatüin namüin. ¿Püshateeinche nakuwaʼipa?