Pagligad sang pila ka tion sa tapos nagdamgo si Hari Nabocodonosor parte sa estatwa, nagpahimo sia sing daku nga bulawan nga estatwa. Ginbutang niya ini sa kapatagan sang Dura kag ginpatipon sa atubangan sini ang mataas nga mga opisyal sang pungsod, pati na si Sadrac, si Mesac, kag si Abednego. Ang hari nagsugo: ‘Kon mabatian ninyo ang tunog sang mga budyong, arpa, kag daku nga mga plawta, magyaub kamo sa estatwa! Ang bisan sin-o nga indi magyaub ihaboy sa nagakalayo nga hurno.’ Magayaub bala sa estatwa ang tatlo ka Hebreo, ukon si Jehova lamang ang ila simbahon?

Dayon nagsugo ang hari nga magtokar sing musika. Nagyaub ang tanan kag nagsimba sa estatwa, pero si Sadrac, si Mesac, kag si Abednego wala magyaub. Nakita sila sang pila ka lalaki kag ginsugid ini sa hari: ‘Ang tatlo ka Hebreo wala nagsimba sa imo estatwa.’ Ginpatawag sila sang hari kag ginsilingan: ‘Hatagan ko kamo liwat sing tsansa nga magsimba sa estatwa. Kon indi kamo magsimba, ihaboy ko kamo sa hurno. Wala sing dios nga makaluwas sa inyo batok sa akon.’ Nagsabat sila: ‘Indi namon kinahanglan ang isa pa ka tsansa. Luwason kami sang amon Dios. Pero bisan indi niya kami pagluwason, O hari, indi gid kami magsimba sa estatwa.’

Naakig gid si Nabocodonosor. Ginsilingan niya ang iya mga tinawo: ‘Painita ninyo ang hurno sing pito pa ka pilo!’ Dayon ginsugo niya ang iya mga soldado: ‘Gapusa ninyo ini nga mga lalaki kag ihaboy sila sa sulod!’ Grabe gid kainit ang hurno, amo nga ang mga soldado nga  nagapalapit sa sini nagakapatay dayon. Ginhaboy ang tatlo ka Hebreo sa kalayo. Pero sang nagtulok si Nabocodonosor sa sulod sini, apat ka lalaki ang iya nakita imbes nga tatlo, kag nagalakatlakat sila sa sulod sang hurno. Hinadlukan sia kag ginpamangkot ang iya mga opisyal: ‘Indi bala tatlo ka lalaki ang ginhaboy naton sa kalayo? Pero apat ang nakita ko, kag ang isa daw pareho sa anghel!’

Nagpalapit diutay si Nabocodonosor pakadto sa hurno kag nagsinggit: ‘Gua kamo nga mga alagad sang Labing Mataas nga Dios!’ Natingala gid ang tanan sang nakita nila nga naggua si Sadrac, si Mesac, kag si Abednego nga wala maano. Ang ila panit, buhok, kag bayo wala masunog, kag wala gani sila sing baho sang aso.

Si Nabocodonosor nagsiling: ‘Dalayawon gid ang Dios ni Sadrac, ni Mesac, kag ni Abednego. Nagpadala sia sing anghel para luwason sila. Wala sing dios nga pareho sa iya.’

Pareho sa tatlo ka Hebreo, mangin mainunungon ka man bala kay Jehova bisan ano pa ang matabo?