Oruveze oruṱiṱi Ombara Nebukadnesar tja za nokukara noruroto ohunga notjisanekero tjomundu, eye wa tjita otjisanekero otjinene tjongoldo. Eye we tji twa morutjandja rwaDura na isana ovandu ovananḓengu tjinene mehi na wina Sadrak, Mesak na Abed-Nego kutja ve yekuworonganena komurungu watjo. Ombara ya rakiza nai tja: ‘Mokamanga tji mwa zuu ombosiro yovinangoma, oviharpe nozohiva, mamu sokuripeta namu rikotamene kotjisanekero! Ngamwa auhe ngu hina okurikotamena ku tjo ma yumbwa mezuko romuriro.’ Nu hapo ovazandona Ovaheberi 3 mave rikotamene kotjisanekero hi, poo mave rikotamene ku Jehova porwe?

Okuzambo ombara ya rakiza kutja omusiki u nyandwe. Ovandu avehe pendje na Sadrak, Mesak na Abed-Nego, va wa onḓurumika nave rikotamene kotjisanekero. Ovarumendu tjiva va muna otjiṋa hi nave raera ombara ave tja: ‘Ovaheberi vetatu mbo va panḓa okurikotamena kotjisanekero.’ Nebukadnesar wa raa kutja ve ye na tja ku wo: ‘Ami me mu pe oruveze rwarwe rukwao rwokurikotamena kotjisanekero. Tji mu ha tjitire nao, ami me mu yumbu mezuko romuriro. Kape nomukuru ngu ma yenene okumuyama ku ami.’ Owo va zira nave tja: ‘Katu nakuhepa okupewa oruveze rwarwe. Mukuru wetu me tu yama. Posiya nandarire tje ha tjitire nao, Muhona ombara, eṱe kamaatu rikotamene kotjisanekero.’

Nebukadnesar wa pindika tjinene na tja kovakarere ve: ‘Rundiseye ezuko romuriro povikando hambombari kombanda ya indu tji pe kara!’ Okuzambo wa rakiza ovarumendu ve ovarwe na tja: ‘Pandekeye ovarumendu  vetatu mba nu mu ve yumbe mezuko romuriro!’ Ezuko ra rundisirwe tjinene nga otururumo tji twa nyosa ovarwe tji va vaza popezu, natu ve zepa. Ovaheberi 3 va yumbwa momuriro. Posiya Nebukadnesar tja tara moukoto, eye wa muna kutja mu novarumendu 4 mbu mave ryanga moukoto wezuko moruveze rwa 3. Eye wa uruma a pura kovahongore ve na tja: ‘Katu yumbire ovarumendu vetatu uriri momuriro? Ami me munu vane nu umwe wawo ma munika tjimuna omuengeli!’

Nebukadnesar wa ryama popezu nezuko a ravaere na tja: ‘Piteye vakarere vaNdjambi wokOmbandambanda!’ Ovandu avehe va himinwe tji va muna Sadrak, Mesak na Abed-Nego amave piti mezuko romuriro nokuhina otjipo. Omikova vyawo, ozondjise nozombanda zawo kaze ya rora okupya nu nandarire kaave ṋuka omuise.

Nebukadnesar wa tja: ‘Ndjambi waSadrak, Mesak na Abed-Nego omunene. Eye wa hinda omuengeli we kutja me ve yame. Kape nomukuru warwe posi yaMukuru wawo.’

Ove we rimana kutja mo rire omuṱakame ku Jehova tjimuna Ovaheberi 3 mba, kainatja kutja pe ya tjike?