Pengudah Raja Nebukadnesar bemimpi pasal patung ti besai nya, iya ngasuh orang nirika siti patung besai ke digaga ari emas. Iya nirika nya ba emperan Dura lalu ngangau semua orang ti bepangkat tinggi ba menua nya, nyengkaum Sadrak, Mesak enggau Abednego begempuru ba mua patung nya. Raja merintah: ‘Lebuh kita ninga munyi terumpit, belikan enggau perengka musik ke bukai, kita enda tau enda meremi ngagai patung nya. Sapa ke enda meremi deka ditikauka ngagai serumbung api.’ Kati tiga iku nembiak Hebrew nya deka meremi ngagai patung nya tauka sida deka nyembah semina Jehovah aja?

Udah nya, raja ngasuh musik ditebah. Semua orang meremi lalu nyembah patung kelimpah ari Sadrak, Mesak enggau Abednego. Sekeda orang ke beratika tu madah ngagai raja: ‘Tiga iku orang Hebrew nya enggai nyembah patung ke digaga nuan.’ Nebukadnesar ngasuh orang mai sida tiga ngagai iya lalu ku iya: ‘Aku meri kita peluang sekali da agi nyembah patung tu. Enti kita enggai, aku deka muai kita ngagai serumbung api. Nadai seiku petara ti ulih ngelepaska kita ari aku.’ Saut sida: ‘Kami tetap enggai. Petara kami ulih ngelepaska kami. Tang enti Iya enda, kami tetap enggai nyembah patung nya.’

Nebukadnesar amat ringat. Iya ngasuh orang iya: ‘Pasangka api dalam serumbung nya tujuh kali angat agi ari selama!’ Iya lalu ngasuh bala soldadu iya: ‘Tanchangka sida tiga lalu tikau ke dalam nya!’  Serumbung api nya amat angat nyentukka bala soldadu ke semak enggau api nya, mati tekala nya. Tiga iku nembiak Hebrew nya dibuai ngagai api nya. Lebuh Nebukadnesar meda ke dalam, iya meda ukai tiga iku tang bisi empat iku orang bejalai ba serumbung api nya. Iya nyadi takut lalu nanya bala pemesai iya: ‘Ukai enda kitai nikau tiga iku orang ngagai api? Tang aku meda empat iku, lalu seiku ari sida nya baka melikat!’

Nebukadnesar mansang semak ngagai serumbung api lalu ngangau: ‘Pansut kita! Nembiak Petara ti Pemadu Tinggi!’ Semua orang alit ati meda Sadrak, Mesak enggau Abednego pansut ari serumbung api enda bebadi. Kulit, buk enggau gari sida enda angus, lalu sida enda bebau asap.

Ku Nebukadnesar: ‘Pujika Petara ti disembah Sadrak, Mesak enggau Abednego. Iya udah ngirumka melikat Iya, lalu ngelepaska sida. Nadai petara bukai baka ke disembah sida.’

Baka tiga iku nembiak Hebrew nya, kati nuan keran deka tetap ati ngagai Jehovah enda ngira nama utai ti nyadi?