Nebuhkadneza gaw gawng ngu sumla yup mang mu nna shaning law law na ai hpang, grai kaba ai aja gawng ngu sumla langai hpe galaw ai. Dai sumla hpe Dura pa hta tawn da ai. Dai hpang, Shadrak, Meshak hte Abed-nego hte hpawn mungdan ting kaw na ahkayk ai masha ni hpe shaga nna, dai gawng ngu sumla shawng hta sa zup hpawng shangun ai. Hkawhkam wa ndai hku matsun dat ai: ‘Pahtau, tingse hte sumpyi nsen na ai hte kalang ta, dai sumla hpe nanhte gum dagup nawku ra ai. N nawku ai masha kadai wa mi raitim, grung nga ai wan htung hta kabai bang kau ai hkrum na.’ Hebre ramma 3 gaw dai sumla hpe gum dagup nawku na kun? Shing n rai Yehowa hpe sha nawku na kun?

Dai hpang, hkawhkam wa gaw madum sumpyi dum na matu tsun dat ai. Shadrak, Meshak hte Abed-nego hta lai nna, kaga masha yawng gaw sumla hpe gum dagup nna nawku ma ai. Masha nkau mi gaw shanhte hpe sadi hkrup nna, hkawhkam wa hpe ndai hku sa tsun ma ai: ‘Nang galaw da ai sumla hpe dai Hebre ramma 3 gaw n nawku ma ai.’ Dai majaw, Nebuhkadneza gaw shanhte hpe shaga nna, ndai hku tsun ai: ‘Gawng ngu sumla hpe nawku na matu, ngai nanhte hpe ahkaw ahkang kalang bai jaw na. Nanhte n nawku yang gaw, grung nga ai wa htung kata de, kabai jahkrat kau na. Nye a lata kaw nna, nanhte hpe hkye la lu ai Karai nga na n re.’ Shanhte ndai hku bai tsun ai: ‘Anhte hpe ahkaw ahkang kalang bai jaw n ra ai. Anhte a Karai Kasang gaw anhte hpe hkye la lu ai. Lama na, anhte a Karai Kasang anhte hpe n hkye la yang pyi, Hkawhkam wa e, na a gawng ngu sumla hpe anhte nawku na n re.’

Nebuhkadneza grai masin pawt mat ai. Shi a masha ni hpe ndai hku tsun dat ai: ‘Grung nga ai wan htung hpe mi  na hta, htam 7 grau kahtet hkra galaw dat mu!’ Dai hpang, shi a hpyen la ni hpe ndai hku tsun ai: ‘Ndai marai 3 hpe gyit nna, wan htung kata de kabai bang kau mu!’ Hebre ramma masum gaw wan htung kata de jahkrat kau hkrum ai. Wan htung gaw grai kahtet ai majaw, hpyen la ni gaw wan htung makau hta sha si mat ma ai. Grung nga ai wan htung kata de, Nebuhkadneza mada yu dat yang, marai 3 n re ai sha, marai 4 lam hkawm taw nga ai hpe mu ai. Shi kajawng nna, shi a du salang ni hpe ndai hku tsun ai: ‘Wan kata de anhte kabai bang kau dat ai gaw marai 3 sha n re i? Ya, ngai marai 4 hpe mu taw nga ai. Shanhte kaw nna langai gaw lamu kasa nsam rai taw nga ai.’

Nebuhkadneza gaw grung nga ai wan htung makau de sa nna, ndai hku marawn ai: ‘Tsaw Htum ai Karai Kasang a mayam ni e, pru wa marit!’ Shadrak, Meshak hte Abed-nego gaw wan n hkru ai sha, lam hkawm let pru wa ai majaw, masha yawng mau mahka mat ma ai. Shanhte a kara, ashan, hpun palawng hpe wan n hkru ai sha n ga, wan sama pyi n kap ai.

Nebuhkadneza ndai hku tsun ai: ‘Shadrak, Meshak hte Abed-nego ni a Karai Kasang gaw tsaw htum ai wa re. Shi gaw shi a lamu kasa hpe dat dat nna, shanhte hpe hkye la sai. Shanhte a Karai Kasang hte bung ai karai n nga ai.’

Hebre ramma 3 zawn, nang mung hpa mi byin wa tim, Yehowa hpa sha sadi dung na ngu dawdan da ai kun?