Moqon chik, naq li awabʼej Nabucodonosor xmatkʼe li jalam u, kixtaqla xyiibʼankil jun li nimla jalam u re oor. Kixkʼe saʼ xtaqʼahil Dura ut kixchʼutubʼ chixjunil ebʼ li wankebʼ xwankil saʼ li tenamit, saʼ xyanqebʼ aʼin wank laj Sadrac, laj Mesac ut laj Abednego. Li awabʼej kixye: «Naq teerabʼi xyaabʼ li trompeet, li aarp ut li pur, tento naq teewiqʼibʼ eeribʼ chiru li jalam u. Li inkʼaʼ tixbʼaanu tkutmanq saʼ xaml». Kʼaru nakaaye? Ma teʼxwiqʼibʼ ribʼ chiru li jalam u li oxibʼ chi al aj Hebreo? Malaj kaʼajwiʼ li Jehobʼa teʼxloqʼoni ru?

Tojaʼ naq, li awabʼej kixye naq teʼxkʼe li bʼich. Chixjunilebʼ keʼxwiqʼibʼ ribʼ ut keʼxloqʼoni li jalam u. Abʼan, laj Sadrac, laj Mesac ut laj Abednego inkʼaʼ keʼxbʼaanu. Wankebʼ li winq keʼril aʼin ut keʼxye re li awabʼej: «Ebʼ li oxibʼ chi al inkʼaʼ yookebʼ xloqʼoninkil ru laajalam u». Laj Nabucodonosor kixtaqla xbʼoqbʼal ebʼ li oxibʼ chi saaj al ut kixye rehebʼ: «Tinkʼe wiʼ chik eehoonal re naq teeloqʼoni ru li jalam u. Wi inkʼaʼ nekeebʼaanu, texkuteʼq saʼ xaml. Maajun yos truuq eekolbʼal saʼ wuqʼ». Aʼanebʼ keʼxye: «Moko aajel ta ru naq taakʼe wiʼ chik qahoonal. Li Qayos truuq qakolbʼal. Usta inkʼaʼ tooxkol, at awabʼej, inkʼaʼ tqaloqʼoni ru li jalam u».

Kʼajoʼ naq kichalk xjosqʼil laj Nabucodonosor. Kixye rehebʼ li winq: «Kʼemaq wuqubʼ sut xtiqwal li xaml!». Chirix chik aʼan, kixtaqla ebʼ laj puubʼ: «Bʼakʼomaq ebʼ li winq aʼin ut kutumaqebʼ saʼ xaml». Kʼajoʼ xtiqwal li xnaʼaj li xaml joʼkan naq ebʼ laj puubʼ keʼkamk naq  keʼnachʼok chixkʼatq li xaml. Ebʼ li saaj al keʼkuteʼk saʼ xaml. Moqon, laj Nabucodonosor kinachʼok saʼ xnaʼaj li xaml ut kiril naq wankebʼ kaahibʼ chi winq li yookebʼ chi bʼeek chisaʼ, moko oxibʼebʼ ta chik. Kʼajoʼ naq kichalk xxiw ut kixpatzʼ rehebʼ li winq: «Ma inkʼaʼ tabʼiʼ oxibʼ chi winq xqakut saʼ xaml? Nawil naq kaahibʼebʼ, ut jun rehebʼ chanchan jun li anjel!».

Laj Nabucodonosor kijilok chire li xaml ut kixjap re: «Elenqex chaq, aj kʼanjel chiru li Nimajwal Yos!». Chixjunilebʼ keʼsachk xchʼool chi rilbʼal naq laj Sadrac, laj Mesac ut laj Abednego keʼelk chaq saʼ xaml ut maakʼaʼ tzʼaqal keʼxkʼul. Inkʼaʼ kʼatal ebʼ li rismal chi moko li xtʼikrebʼ, ut moko wank ta xbʼook sibʼ chiruhebʼ.

Laj Nabucodonosor kixye: «Li Xyos laj Sadrac, laj Mesac ut laj Abednego jwal nim xwankil! Kixtaqla li xʼanjel re xkolbʼalebʼ. Maajun chik yos joʼ li rehebʼ».

Ebʼ li oxibʼ chi saaj al chʼolchʼo chiruhebʼ naq inkʼaʼ teʼxtzʼeqtaana li Jehobʼa, maakʼaʼ naxye kʼaru teʼxkʼul. Ma nakaawaj xkʼambʼal aawe rikʼinebʼ?