Hĩndĩ ĩmwe thutha wa Mũthamaki Nebukadinezaru kuona mũhianano kĩroto-inĩ, nĩ aathondekire mũhianano mũnene mũno wa thahabu. Aũhandithirie werũ-inĩ wa Dura na agĩta andũ arĩa a bata mũno bũrũri-inĩ ũcio o hamwe na Shadraka, Meshaka, na Abedinego nĩguo macemanie ho. Mũthamaki aathanire ũũ: ‘Rĩrĩa mũrĩigua mũgambo wa tũrumbeta, thethe, na inanda cia kĩnubi, inyuothe mwagĩrĩirũo kũinamĩrĩra mũhianano ũcio! Mũndũ o wothe ũtekwĩgũithia thĩ aũhoe, egũikio mwaki-inĩ.’ Hihi Ahibirania acio atatũ nĩ mangĩainamĩrĩire mũhianano ũcio, kana mangĩahoire Jehova Ngai wao?

Mũthamaki aacokire agĩathana gũthaakwo nyĩmbo. Andũ othe nĩ mainamĩrĩire na makĩhoya mũhianano ũcio tiga o Shadraka, Meshaka, na Abedinego. Andũ amwe nĩ maamonire na makĩra mũthamaki ũũ: ‘Ahibirania arĩa atatũ nĩ maregire kũhoya mũhianano waku.’ Nebukadinezaru nĩ oigire matwarũo kũrĩ we na akĩmeera ũũ: ‘Nĩ ngũmũhe mweke ũngĩ wa kũhoya mũhianano ũcio. Mwarega kũũhoya, ngũmũikia mwaki-inĩ. Gũtirĩ ngai ũngĩhota kũmũhonokia amũrute moko-inĩ makwa.’ Nao makĩmwĩra ũũ: ‘Tũtikũbatara kũheo mweke ũngĩ. Ngai witũ nĩ egũtũhonokia. Na o na angĩkorũo ndegũtũhonokia-rĩ, kĩmenye atĩrĩrĩ we mũthamaki witũ, ithuĩ tũtikũhoya mũhianano ũcio.’

Nebukadinezaru nĩ aarakarire mũno. Eerire andũ ake ũũ: ‘Ongererai ngũ riiko nĩguo mwaki wakane maita mũgwanja gũkĩra ũrĩa wakanaga!’  Aacokire akĩra thigari ũũ: ‘Ohai andũ aya, mũcoke mũmaikie riiko!’ Mwaki ũcio wakanĩte mũno ũũ atĩ rĩrĩa thigari ciaũkuhĩrĩirie, ciakuire hau hau. Ahibirania acio atatũ nĩ maagũire kũu mwaki-inĩ ũcio. No rĩrĩa Nebukadinezaru aacũthĩrĩirie riiko rĩu, onire kũrĩ andũ ana handũ ha atatũ na nĩ gũceera maceeraceeraga kũu mwaki-inĩ. Nĩ aamakire mũno na akĩũria anene ũũ: ‘Na githĩ tũtiikirie andũ atatũ mwaki-inĩ? Ndĩrona andũ ana, na ũmwe wao ahaana mũraika!’

Nebukadinezaru nĩ aathiire hakuhĩ na riiko na akiuga ũũ: ‘Umai mũke inyuĩ ndungata cia Ngai-Ũrĩa-Ũrĩ-Igũrũ-Mũno!’ Andũ othe nĩ maamakire kuona Shadraka, Meshaka, na Abedinego makiuma mwaki-inĩ matahĩte handũ o na ha. Matianungaga mwaki na gũtirĩ handũ maahĩte mwĩrĩ, njuĩrĩ, o na kana nguo.

Nebukadinezaru oigire ũũ: ‘Ngai wa Shadraka, Meshaka, na Abedinego nĩ mũnene. Nĩ atũmire mũraika wake amahonokie. Gũtirĩ ngai ũhaana Ngai wao.’

Hihi wee nĩ ũtuĩte itua ta Ahibirania acio atatũ rĩa gũikara ũrĩ mwĩhokeku harĩ Jehova gũtekũmakania ũrĩa maũndũ mahaana?