Mɛɛ Masaa Nɛbukanɛɛsa sɔl luaŋ a piɔm bɛndu bɛndoo okɔɔ, teleŋ biŋgi okoŋ kɔɔli, mbo toosiaa piɔm bɛndu bɛndoo a kooliiyoŋ. Mbo simi ndu o dɛŋgbɔɔ niŋ Dulua, okoŋ mbo veelu laŋgbaa nduaa kalla kpou o lɛŋnde leŋ niŋ, kɔ bii Siadulua, Mɛsiaki, a Abɛniko, le ma huŋ sim piɔm koŋ lachi. Mi masaa dimi aa: ‘Te la tuei dɔɔ pɛ bululaŋ, dundulaŋ, a nyɛm chaaŋ cheleŋndoŋ suɛi, la baŋ wulaŋ piɔmndo hoo lachi! Wana o wana kɛɛ pɛ le wulaŋ baŋɔɔ, I cho ndu wou o yiŋnde tondoleŋ niŋ.’ Baa puaa Hibuluiyaa yaa wa haa wa pa wulaŋ baŋɔɔ piɔmndo hoo lachi ɔɔ Chɛhowa kinɛi nda wa piɛi ni?

Okoŋ, mi masaa dimul waŋnda le ma kandu nyɛchaa lɔɔ. Mi waŋnda kpou baŋ wulaŋ ma sooluu piɔm ŋkoolii koŋ. Kɛ mi Siadulua, Mɛsiaki, a Abɛniko kɛɛ le wulaŋ baŋɔɔ. Mɛɛ waŋnda apum che nda isisi, ma kɔ dimul masaa aa: ‘Hibuluiyaa yaa wa haa kɛɛ le piɔm ŋ toosiaa wo sooluuwo.’ Mi Nɛbukanɛɛsa viam waŋnda le ma kɔ veelu nda. Mbo dimul nda aa: ‘I cho nya chɔɔlu teleŋndo ke le mi la sooluu piɔmndo hoo. Kɛ te la kɛɛ pɛ, I cho nya wou o yiŋnde tondoleŋ niŋ. Nduyɛ mɛlɛka o mɛlɛka cho mbo chiindiaa nya ya o ba le.’ Ma dimul ndu aa: ‘Ke naa teleŋ o teleŋ cheleŋ te. Mɛlɛka naa cho naa chiindiaa. Fallo masaa, mbo chiindiaa naa bɛɛ le, ŋ cho piɔm numndo sooluu le.’

Mi Nɛbukanɛɛsa tuulu kɔl tau tau. Mbo dimul puaa nduaa aa: ‘La tuulu tondo leyiŋndo mbo hiou maa paandu sala ŋɔmmɛu!’ Okoŋ mbo dimul puaa nduaa chɔuwa aa: ‘La yii nda mi la wou nda o yiŋ!’ Tondo  leyiŋndo ndoo hiu ba a tuuloo. Le hei, mɛɛ puaa chɔuwaa wa nda wouwo o yiŋ nda sɔɔŋguu ikɛi, ma wu o foofo. Mi puaa Hibuluiyaa yaa wa del o yiŋnde leŋ niŋ. Kɛ mɛɛ Nɛbukanɛɛsa nua o yiŋndeŋ niŋ, o chi lɛ puaa a yaa le, kɛ mbo cha wanaa hiɔɔlu balɔɔ o leŋ niŋ. Mi siooŋnde bii ndu, okoŋ mbo nyuna laŋgbaa nduaa kalla aa: ‘O cho puaa a yaa le naŋ wou o yiŋndeŋ niŋ te? Kɛ wanaa hiɔɔlu ya cho chɔɔ ni, nduyɛ waŋndo opilɔɔ a che ndu pɛ aa maalikɛinɔɔ ni!’

Mi Nɛbukanɛɛsa sɔɔŋguu tondo leyiŋndo ikɛi, mbo veelu choo choo aa: ‘Nya buɛiyaa Mɛlɛka Hiou Kpou Wo, la fula!’ Mi kaama bii waŋnda mɛɛ nda che Siadulua, Mɛsiaki, a Abɛniko fulaa o yiŋnde leŋ niŋ nyɛ o nyɛ yɔŋnuŋ nda le. Dialuŋ ndaŋ ni, yiiŋii ndɛi ni, a nyɛla wa nda lekɔɔ laŋ, nyɛ o nyɛ ŋue le. Nduyɛ chuŋ leyiŋndo bɛɛ ve nda lekɔɔ le.

Mi Nɛbukanɛɛsa dimi aa: ‘Mɛlɛka Siadulua, Mɛsiaki, a Abɛniko wo cho bɔɔ o bɛndu. Mbo yɔŋ maalikɛinɔ ndɔɔ mbo piŋi nda. Mɛlɛka o mɛlɛka cho maa Mɛlɛka ndaa le.’

A kɛɛsiaŋ pa o kɔl le ma hiou lachi a Chɛhowa piɛiyo maa puaa yaa wa haa mɛɛ mɛɛ la wa?