တၢ်မၤလိ ၆၁
အဝဲသ့ၣ်တဘါထီၣ်တၢ်ဂီၤဖးဒိၣ်ဘၣ်
ဖဲစီၤပၤနဘူၤကးန့စၢ် မံမီၢ်ဝဲတၢ်ဂီၤဖးဒိၣ် တယံာ်တမီၢ်ဝံၤအလီၢ်ခံ အဝဲတ့ထီၣ်ဝဲတၢ်ဂီၤထူဖးဒိၣ်တဒုလီၤ. တၢ်ဂီၤထူဖးဒိၣ်တဒုအံၤ ဘၣ်တၢ်တ့ထီၣ်အီၤဖဲ ဒူရၤအတၢ်ပျီဖးလဲၢ်အပူၤလီၤ. ဝံၤဒီးစီၤပၤနဘူၤကးန့စၢ် ကိးဖှိၣ်ဝဲကယဲၢ်ပှၤအရ့ဒိၣ်တဖၣ် လၢအထံကီၢ်ပူၤလီၤ. လၢပှၤသ့ၣ်တဖၣ်အံၤအကျါန့ၣ် ပၣ်ဃုာ်ဒီးစီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤလီၤ. ဒီးစီၤပၤဟ့ၣ်လီၤတၢ်ကလုၢ်လၢ– ‘ဖဲသုနၢ်ဟူ ကွဲၤ, တနၢ်, ဒီးပံအကလုၢ်သီၣ်ထီၣ်အခါန့ၣ် ပှၤကိးဂၤဒဲးကဘၣ်ဘါထီၣ် တၢ်ဂီၤထူတဒုအံၤလီၤ. ပှၤတဂၤဂၤ မ့ၢ်တဘါထီၣ်တၢ်ဂီၤထူတဒုအံၤန့ၣ် ကဘၣ်တၢ်တ့ၢ်လီၤကွံာ်အီၤ လၢမ့ၣ်အူပူၤလီၤ. မ့ၢ်ပှၤဧ့ၤဘြံၤဖိသၢဂၤအံၤ ကဘါထီၣ်ဝဲတဂီၤထူဧါ မ့တမ့ၢ် မ့ၢ်အဝဲသ့ၣ်ကဆဲးဘါထီၣ်ဝဲ ယဟိဝၤယွၤထဲတဂၤဧိၤဧါ.’
ဝံၤဒီးစီၤပၤမၤလိာ်ဝဲလၢ ပှၤကဒ့ဝဲတၢ်ဒ့တၢ်အူလီၤ. ဖဲတၢ်ဒ့တၢ်အူသီၣ်ထီၣ်ဝဲအခါ ပှၤကိးဂၤဒဲးတီၤလီၤအခိၣ်ဒီး ဘူၣ်ထီၣ်ဘါထီၣ်ဝဲ တၢ်ဂီၤထူတဒုအံၤလီၤ. ဘၣ်ဆၣ် ထဲဒၣ်စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ် တဘူၣ်ထီၣ်ဘါထီၣ်ဝဲ တၢ်ဂီၤထူတဒုအံၤဘၣ်. လၢတၢ်န့ၣ်အဃိ ပှၤပိာ်ခွါတနီၤ လဲၤတဲဘၣ်စီၤပၤလၢ– ‘ပှၤဧ့ၤဘြံၤဖိသၢဂၤန့ၣ် တဘါထီၣ်ဝဲနတၢ်ဂီၤထူဘၣ်.’ ဒီးစီၤပၤနဘူၤကးန့စၢ် မၢလီၤအပှၤဆူအဝဲသ့ၣ်အအိၣ် ဒီးတဲဝဲလၢ– ‘ယကဟ့ၣ်သု တၢ်ခွဲးတၢ်ယာ်အသီတဘျီလၢ သုကဘါထီၣ်တၢ်ဂီၤထူလီၤ. သုမ့ၢ်တဘါထီၣ်န့ၣ် ယကတ့ၢ်လီၤသုလၢမ့ၣ်အူပူၤလီၤ. ဒီးယွၤလၢအကမၤပူၤဖျဲးသုလၢ ယစုပူၤသ့န့ၣ်တအိၣ်နီတဂၤဘၣ်.’ ပှၤဧ့ၤဘြံၤဖိသၢဂၤအံၤ တဲဆၢက့ၤစီၤပၤလၢ– ‘ပတလိၣ်ဘၣ်တၢ်ခွဲးတၢ်ယာ်လၢ အသီတဘျီဘၣ်. ပနာ်လၢပကစၢ်ယွၤ မၤပူၤဖျဲးပှၤလၢ နစုပူၤသ့ဝဲလီၤ. ပကစၢ်ယွၤမ့ၢ် တမၤပူၤဖျဲးပှၤသနာ်က့ စီၤပၤဧၢ, လ့ၤတက့ၤ ပတဘါထီၣ်နတၢ်ဂီၤထူဘၣ်.’
ဖဲစီၤပၤနဘူၤကးန့စၢ် နၢ်ဟူဘၣ် အဝဲသ့ၣ်အတၢ်ကတိၤအခါ အသးပှံၢ်ထီၣ် တၢ်ဒိၣ်မးလီၤ. အဝဲတဲဘၣ် အခ့အပှၤလၢ– ‘မၤကိၢ်ထီၣ်မ့ၣ်အူနွံစးတက့ၢ်.’ ဝံၤဒီးစီၤပၤတဲဘၣ်အသုးဖိတဖၣ်လၢ– ‘စၢထီၣ်ပှၤဧ့ၤဘြံၤဖိသၢဂၤအံၤ ဒီးတ့ၢ်လီၤအဝဲသ့ၣ်လၢ မ့ၣ်အူပူၤခဲအံၤ.’ မ့ၢ်လၢမ့ၣ်အူကိၢ်ဝဲဒိၣ်မးအဃိ ဖဲပှၤသုးဖိတဖၣ် သုးဘူးအသးဆူမ့ၣ်အူကပၤ ဒ်သိးကတ့ၢ်လီၤဝဲ ပှၤဧ့ၤဘြံၤဖိသၢဂၤအံၤလၢ မ့ၣ်အူပူၤအခါ, မ့ၣ်အူအီၣ်ကွံာ်ဝဲ ပှၤသုးဖိတဖၣ်အံၤဒီး အဝဲသ့ၣ်သံဝဲတဘျီဃီလီၤ. ဘၣ်ဆၣ် ဖဲစီၤပၤနဘူၤကးန့စၢ် ကွၢ်လီၤဝဲလၢမ့ၣ်အူပူၤအခါ အဝဲထံၣ်ဝဲပှၤလွံၢ်ဂၤ ဟးဝဲလၢမ့ၣ်အူကျါလီၤ. ဖဲစီၤပၤထံၣ်တၢ်မၤအသးဒ်အံၤအခါ အဝဲပျံၤတၢ်ဒိၣ်မး ဒီးသံကွၢ်ဝဲအပဒိၣ်တဖၣ်လၢ– ‘ပတ့ၢ်လီၤပှၤလၢမ့ၣ်အူကျါန့ၣ် ထဲသၢဂၤလီၤတမ့ၢ်ဧါ. ခဲအံၤ ယထံၣ် ပှၤလွံၢ်ဂၤညါ ဒီးလၢအကျါတဂၤန့ၣ် လီၤဂာ်လၢမူခိၣ်ကလူးလီၤ.’
စီၤပၤနဘူၤကးန့စၢ် လဲၤသုးဘူးအသးလၢ မ့ၣ်အူကပၤဒီးကိးထီၣ်ဝဲလၢ– ‘ယွၤလၢအထီကတၢၢ်တဂၤ အခ့အပှၤသ့ၣ်ဧၢ ဟဲက့ၤထီၣ်တက့ၢ်.’ ဖဲစီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ ဟဲက့ၤထီၣ်ဝဲလၢမ့ၣ်အူပူၤအခါ မ့ၣ်အူတအီၣ်အဝဲသ့ၣ် အဖံးဘ့ၣ်, အခိၣ်ဆူၣ်, အဆ့ကၤဘၣ်. ဒီးအမိၢ်ပှၢ်တနၢလၢ မ့ၣ်အူလုၢ်စ့ၢ်ကီးဘၣ်. လၢတၢ်န့ၣ်အဃိ ဖဲပှၤဂီၢ်မုၢ်ထံၣ်ဝဲအခါ အဝဲသ့ၣ်ကမၢကမၣ်ဝဲဒိၣ်မးလီၤ.
စီၤပၤနဘူၤကးန့စၢ် တဲဝဲလၢ– ‘စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤ အယွၤန့ၣ်မ့ၢ်ကစၢ်ယွၤလၢ အစိကမီၤဒိၣ်ကတၢၢ်တဂၤလီၤ. အဝဲဆှၢလီၤမူခိၣ်ကလူး ဒ်သိးကမၤပူၤဖျဲးအခ့အပှၤအဂီၢ်လီၤ. အဃိ ကစၢ်ယွၤလၢအဒ်သိးဒီးအဝဲသ့ၣ်အယွၤန့ၣ် တအိၣ်နီတဂၤဘၣ်.’
ဖဲနထံၣ်ဘၣ် တၢ်ကီတၢ်ခဲအခါ မ့ၢ်နပာ်လီၤနသးဂၢၢ်ဂၢၢ်ကျၢၤကျၢၤလၢ နကတီဒီးယဟိဝၤယွၤ ဒ်ပှၤဧ့ၤဘြံၤဖိသၢဂၤအံၤအသိးစ့ၢ်ကီးဧါ.
“ယွၤနကစၢ်န့ၣ် နဘၣ်ဘူၣ်ထီၣ်ဘါထီၣ်အီၤ, ဒီးနဘၣ်မၤထဲ အဝဲဒၣ်အတၢ်ဧိၤလီၤ.”—မးသဲ ၄:၁၀
