Ke vavioka kolo ko vava Ntinu Nebukandesa kalota e ndozi ya teke, wavanga teke kiampwena kia wolo. Wadongeka kio vana ndimb’a Dura yo bokelesa e mfumu zawonso za nsi, kumosi yo Saderake, Misake yo Abedengo kimana bakutakana vana ntwal’a teke. O ntinu wakanikina vo: ‘Vava nuwá e zú dia mpungi, dia matutu ye lungungu, nufukamena e teke. Konso ona kefukama ko, otubwa vana yanga dia tiya.’ Nga matoko tatu ma Ayibere befukamena e teke, yovo Yave kaka besambila?

I bosi, o ntinu wakanikina vo basika e mpungi. Wantu awonso bafukama yo sambila e teke, kansi Saderake, Misake yo Abedengo ke bafukamena teke ko. Ana babamona bazayisa kwa ntinu vo: ‘E matoko tatu mama ma Ayibere ke bazolele sambila teke kiaku ko.’ Nebukandesa wababokelesa yo kubavovesa vo: ‘Ikunuvana lau diankaka kimana nuasambila e teke. Avo ke nusambidi teke kiaki ko, ikunutuba vana yanga dia tiya. Ke vena nzambi ko ona olenda kunuvuluza vana moko mame.’ Bavutula vo: ‘Ke tuvuidi mfunu a lau diankaka ko. O Nzambi eto olenda kutuvuluza. Kansi, kana nkutu vo ka tuvulwizi ko, e mfumu, ke tusambila teke ko.’

Nebukandesa wafunga kikilu makasi. Wavovesa makesa mandi vo: ‘Nukudikila tiya vana yanga nkumbu nsambwadi, diakala kikilu tiya lutila una dikalanga.’ I bosi, wakanikina makesa mandi vo: ‘Nukanga wantu awaya, nubatuba vana yanga dia tiya.’ E yanga diadina tiya kikilu diakala. Vava  makesa bafinama vana ndambu, bafwa vana vau. E matoko tatu ma Ayibere batubwa vana tiya. Kansi, vava Nebukandesa katala muna kati, wamona vo wantu yá bakala muna kati, ke ntatu ko, bakangalanga vana yanga dia tiya. Wamona wonga yo yuvula kwa makesa mandi vo: ‘Nga ke wantu tatu ko tutubidi vana yanga dia tiya? Wantu yá mbwene, mosi muna yau una nze mbasi.’

Nebukandesa wafinama vana yanga dia tiya yo boka vo: ‘Nuvaika, yeno selo ya Nzambi Ampungu-ngolo.’ Wantu awonso basivika vava bamona Saderake, Misake yo Abedengo bavaikidi vana yanga dia tiya. E nkanda miau mia nitu, nsuki ye mvuatu miau ke miavia ko ngatu tá nsudi a mwisi.

Nebukandesa wavova vo: ‘O Nzambi a Saderake, Misake yo Abedengo wanene kikilu. Ofididi mbasi andi mu kubavuluza. Ke vena nzambi ko ofwananene ye Nzambi au.’

Nze matoko tatu ma Ayibere, nga una ye kani dia sikila ye kwikizi muna Yave kiakala nkia diambu dikubwila?