Hamulaho wa nako kuzwa falolela tolo Mulena Nebukadenezare ka za siswaniso, aeza siswaniso sesituna sa gauda. Asitoma mwa libala la Dura mi abiza batu babakutekeha hahulu mwa naha, kukopanyeleza Shadrake, Meshaki, ni Abedinego, kuli bato kubukana fapilaa sona. Mulena kihaa laela kuli: ‘Hamuka utwa mulumo wa litolombita, harepa, ni mapaipi, mukubamele siswaniso! Mutu kaufela yasike akubama ukanepelwa mwa liyekuyeku la mulilo.’ Kana mitangana ba Maheberu babalaalu baka kubamela siswaniso, kamba kana bakalapela feela Jehova?

Cwale mulena alaela kuli lipina likale kuliziwa. Batu kaufela bakubama ni kulapela siswaniso kono Shadrake, Meshaki, ni Abedinego bona nebasika eza cwalo. Baana babañwi balemuha taba yeo mi bali ku mulena: ‘Maheberu babalaalu bale bahanile kulapela siswaniso sahao.’ Nebukadenezare aluma batu kuyo bataluseza kuli: ‘Nika mifa kolo yeñwi hape kuli mulapele siswaniso. Haiba hamuna kueza cwalo, nika minepela mwa liyekuyeku la mulilo. Hakuna mulimu yakakona kumisileleza ku na.’ Baalaba kuli: ‘Halutokwi kufiwa kolo yeñwi hape. Mulimu waluna wakona kulupilisa. Kono nihaa sike aeza cwalo, wena mulena, haluna kulapela siswaniso.’

Nebukadenezare ahalifa hahulu. Abulelela baana bahae kuli: ‘Hamueze liyekuyeku la mulilo kuli licise hahulu ha 7 kufita molicisezanga!’ Cwale alaela masole bahae kuli: ‘Hamutame baana ba , mi muba  nepele mwateñi!’ Liyekuyeku nelicisize hahulu kuli mane masole hane basutelezi kwateñi, nebashwile honafo feela. Maheberu babalaalu bao banepelwa mwa mulilo. Kono Nebukadenezare hanangela, abona kuli nekunani baana babane bane basweli kuzamaya-zamaya mwa liyekuyeku la mulilo isiñi babalaalu. Asaba hahulu mi abuza manduna bahae kuli: ‘Kana nelusika nepela baana babalaalu mwa mulilo? Nibona babane, mi yomuñwi wa ku bona ubonahala inge lingeloi!’

Nebukadenezare asutelela bukaufi ni liyekuyeku mi ahuwa kuli: ‘Hamuzwe mo, mina batanga ba Mulimu Yapahami ka Kufitisisa!’ Mañi ni mañi kaufela naakomokile kubona bo Shadrake, Meshaki, ni Abedinego habazwa mwa mulilo basikaca. Mibili yabona, milili yabona, ni libyana zabona nelisika ca, mi nebasa nunki nihaiba musi.

Nebukadenezare ali: ‘Mulimu wa Shadrake, Meshaki, ni Abedinego ki yomutuna. Naalumile lingeloi lahae mi libapilisize. Hakuna mulimu yaswana ni wabona.’

Kana muikatulezi kusepahala ku Jehova kusina taba ni zekona kuezahala, sina mone baezelize Maheberu babalaalu?