Kitatyi kityetye pa kupita’po, na pālotele Mulopwe Nebukaneza kilotwa kya nkishi, wāpungile nkishi umo wa olo mupuñame. Wāmwimika mu dilungu dya Dula, wāityija bantu bavule ba bulēme ba mu ntanda’ya, kubadila’mo ne ba Shadelake, Meshake, ne Abedenengo, mwanda wa bakebungile ku meso a nkishi. Mulopwe wāsoñenye bantu amba: ‘Shi mubaivwana kuvuma kwa bimpungidi, lunsense, ne tupindo, ponai panshi mwivukwile nkishi! Muntu ense usa kupela kwivukwila nkishi ukelwa mu nkelwa ya mudilo.’ Le bano Bahebelu basatu bēvukwidile uno nkishi’ni, nansha bātōtele’nka Yehova kete?

Penepo mulopwe wāsoñanya bantu bombe minjiki. Bantu bonso bāpona panshi kebatōta nkishi kutalula’mo’nka ba Shadelake, Meshake, ne Abedenengo. Bantu bamo pa kwibamona, bākasapwila mulopwe amba: ‘Boba Bahebelu basatu’ba abapele kutōta nkishi obe.’ Nebukaneza wākaseleja bano Bahebelu, kāebanena’mba: ‘Nsa kwimupa mukenga mukwabo wa kutōta uno nkishi. Shi kemumutōtelepo, nsa kwimwela mu nkelwa ya mudilo. I kutupu leza nansha umo usa kubwanya kwimupandija kondi.’ Abo nabo bāmusapwila’mba: ‘Ketusakilwapo wao mukenga’o. Leza wetu ubwanya kwitupandija. Kadi nansha shi ketupandijepo, abe mulopwe, ketusapo kutōta yao nkishi’ye.’

Nebukaneza wālobele bininge. Wāsoñanya bantu bandi amba: ‘Kabijai nkelwa misunsa isamba-ibidi kupita moikabijibwanga!’ Kupwa wāsoñanya basola bandi amba: ‘Kutai bano bantu myonji, mwibele mu nkelwa!’ Nkelwa yākabile bininge, pāfwenene’ko basola, bāfwa ponka na  ponka. Bano Bahebelu basatu bāponene mu mudilo. Inoko Nebukaneza pa kutala’mo, wāmona’mo bantu baná bananga mu nkelwa, pa kyaba kya basatu. Wāzakele bininge wāipangula bengidi bandi amba: ‘Mwene tubaelanga bantu basatu mu mudilo? Ami namone’mo bantu baná, kadi umo mobadi wifwene mwikeulu!’

Nebukaneza wāfwena ku nkelwa wāela lubila’mba: ‘Tambai’mo, banwe bengidi ba Leza Mwine wa Peulu Mwine!’ Bantu bonso bātulumukile pa kumona ba Shadelake, Meshake, ne Abedenengo batamba mu mudilo pampikwa kulongwa kibi. Ngitu yabo, nywene yabo, ne bisandi kebyātēmenepo, kadi kebādipo banunka nansha mwishi.

Nebukaneza wānena’mba: ‘Leza wa ba Shadelake, Meshake, ne Abedenengo, i mukatampe. Wātumenga mwikeulu wandi webapandija. I kutupu leza udi pamo bwa Leza wabo.’

Pamo bwa bano Bahebelu basatu, le nobe wi musumininwe kulamata Yehova nansha shi ubafikilwa na bika?