Lino papisile insita ukufuma pano Umwene Nebukadineza walotiile pa cilubi, wizile apanga icilubi cikulu cakwe goldi. Wacimike umunyika izya Dula nu kwama antu aacindame sana umu mpanga, apaali na Syadilaki, Mesyaki, na Abedinego, kuti iize yacikontamile. Umwene walanzile ati: ‘Ndi cakuti muvwa ukulila kwa ntandala, amazeeze, ni mitolilo, lyene mwensi kwene mulinzile kupona pansi nu kupepa icilubi. Wensi wino amakana Ukufukamila icilubi amasumbilwa umwi lungu lya moto.’ Uzye Aebele yaya yatatu yali nu kukontamila icilubi, nanti yali nu kupepa sile Yeova?

Lyene umwene walanzile ukuti yalizye intandala, amazeeze, ni mitolilo. Lino yalizizye, yonsi yakontiime nu kupepa icilubi kufumyako sile Syadilaki, Mesyaki, na Abedinego. Aonsi yamwi yaweni ukuti kwali yamwi aatakontime nu kuneena umwene iyati: ‘Aebele yaya yatatu iyakana ukupepa icilubi cako.’ Nebukadineza watumile aakuti yakayame, nupya lino yafisile wayaneenyile ati: ‘Namupeela isyuko na lyuze ilyakuti mupepe icilubi. Nga mutacisile vivyo, nimamusumbila umwi lungu. Pasi leza aliwensi amamutula kuli neene.’ Nayo yaswike iyati: ‘Tusikulonda mutupeele isyuko na lyuze. Leza witu amatupususya. Nomba nanti cakuti atatupuswisye, mwene, tukulonda umanye ukuti tutakufukamila icilubi.’

Nebukadineza wasosile sana. Waneenyile antu yakwe ukuti ‘Yaleke ilungu likaye imiku 7 ukucila vino likakaya lyonsi.’ Lyene waneenyile asilika yakwe ati:  ‘Nyepini antu yaa, nu kuyasumbila umwi lungu.’ Ilungu lyali ilikaye sana icakuti lino asilika yapalamile pa kuyasumbila, yafwile papo kwene. Aebele yatatu yasumvilwe umu moto. Nomba lino Nebukadineza wasungamile umwi lungu, waweni ukuti muli antu 4 mu cifulo cakuti yaye yatatu. Uvwile sana intete nupya uzizye aomvi yakwe ati; ‘Uzye tutaali twasumbila aonsi yatatu umwi lungu? Nemo nkulola aonsi 4, nupya wenga akuloleka kwati a malaika.’

Nebukadineza wapalamile ukwi lungu nu kupunda ati: ‘Fumini mweyaomvi yakwe Leza wa Papelapela.’ Yonsi yazungwike lino yaweni ukuti Syadilaki, Mesyaki, na Abedinego yaafumile umwi lungu ukwaula ukupya. Imili yao, inyele, alino ni vyakuzwala vitaapile, nupya yatanunsile ni cunsi.

Nebukadineza watiile: ‘Leza wakwe Syadilaki, Mesyaki, na Abedinego uwa maka. Watatuma malaika wakwe kuti ayapususye. Kutaya Leza uwaya wakwe Leza wao.’

Wakwe vino Aebele yatatu yacisile, uzye nawe ukalonda ukuya uwa cumi kuli Yeova asi mulandu na vino vingacitika?