A Nebukadnezaar sẽn gãand n zãms n yã bõn-naandgã, pa kaoos la yẽ mengã maan bõn-naandg sẽn yaa bed-kẽenga. A maan-a-la ne sãnem, n kɩt tɩ b ning-a Dura weoogẽ wã. A boola tẽngã nin-kãsemsã n kɩt tɩ b tigim be. A Sadrak ne a Mesak la a Abɛdnego naagame. Rĩmã yeela nebã fãa yaa: ‘Yãmb sã n wa wʋm baorgã ne wɩɩgã peebgo, ne yʋʋm-teed buud toay-toay rãamde, bɩ y wõgemd bõn-naandgã taoore. Ned ning sẽn pa wõgemde, b na n lob-a-la wʋng sẽn wɩng pʋgẽ.’ Rẽ yĩnga, ebre kom-dibli a tãabã na n wõgemdame bɩ, bɩ b na n kell n saka a Zeova?

Rĩmã sɩd kõo noor tɩ b sɩng yʋʋm-teedã wẽeb la peebgo. Nebã fãa wõgemdame n waoog bõn-naandgã. La a Sadrak ne a Mesak la a Abɛdnego pa wõgemd ye. Rap n yã, n tɩ togs rĩmã yaa: ‘Ebre rap a tãabã pa waoog fo bõn-naandgã ye.’ A Nebukadnezaar kɩtame tɩ b tall-b n wa, t’a yeel-b yaa: ‘M na n le kɩtame tɩ b sɩng yʋʋm-teedã wẽeb la peebgo. Yãmb sã n pa wõgemde, m na n lob-y-la wʋngã pʋgẽ. Wẽnnaam ka be n na n tõog n fãag yãmb ye.’ La ebre rap a tãabã leokame yaa: ‘Baa fo sã n le kɩt tɩ b sɩnge, d pa na n wõgemd ye. Tõnd Wẽnnaamã tõe n fãaga tõndo. La baa a sã n pa fãag-do, tõnd pa na n waoog fo bõn-naandgã ye.’

A Nebukadnezaar sũurã yika wʋsg t’a yeel nebã yaa: ‘Wɩng-y wʋngã naoor a yopoe t’a tʋʋlmã yɩɩd  pĩnda.’ Rẽ poore, a yeela a sodaasã tɩ b sẽb ebre rapã n lob bugmẽ wã. Wʋngã ra tʋʋla wʋsgo, hal tɩ sodaas nins sẽn kolg n na n lob-bã ki. Ebre rap a tãabã lʋɩɩ bugmẽ wã. A Nebukadnezaar wa n lɩkame n yã rap a naas sẽn kẽnd bugmã pʋgẽ n gilgdẽ. A yɛɛsame n sok a tʋm-tʋmdbã yaa: ‘Pa rap a tãab la tõnd sẽn lob bugmẽ wã la? Mam nee bãmb b naase, la a ye n wẽnd malɛka.’

Rĩmã kolga wʋngã n zẽk a koɛɛg n yeel yaa: ‘Wẽnnaam sẽn tõe fãa wã tʋm-tʋmdbã, wa-y n yi-y-yã!’ Nebã sẽn yã a Sadrak ne a Mesak la a Abɛdnego sẽn yit bugmẽ wã, b yɛɛsa wʋsgo. B yĩngã, b zoobdã la b futã pa yõoge, b ra pa bugum yũug me.

A Nebukadnezaar yeelame: ‘A Sadrak ne a Mesak la a Abɛdnego Wẽnnaamã ka to ye. A tʋma a malɛkã t’a wa fãag-ba. Wẽnnaam ka be n yaa wa bãmb Wẽnnaamã ye.’

Wala ebre rap a tãabã, fo me na n kell n saka a Zeova baa sẽn yaa a soab bɩ?