Mu nima ya ntsimbu tunde ha lotelele Muangana Nevukaneza kamponia, ua pangele kamponia ua kama ua olu. Ua mu tumbikile ku cana ca Ndula na ku sana vantu vakua vukama mu cifuti, hamo lika na Sandelake, Mesake na Avende-nengo ku likungulula ku lutue lueni. Muangana ua va lekele ngueni: ‘Nga mu ivua ku sika ca luneta, halupa, kalialia, saleteliu, tsikamenenu kamponia! Uose ka ka tsikama va ka mu mbila mu lutengo lua tuhia. Vuno vakuendze vatatu va vaHevelu va tsikamenene kamponia ni va tavele ku lemesa lika Yehova?’

Kaha Muangana ua tumine va sike luneta. Ngeci vantu vose va tsikamene na ku lemesa kamponia, ku tundisako lika Sandelake, Mesake na Avende-nengo. Vamo vamala va va muene, va ka lekele muangana nguavo: ‘Vaze vaHevelu va na viana ku lemesa kamponia.’ Nevukaneza ua tumine vantu va ka va hiange kaha ua handekele navo ngueni: ‘Nji mi hana vukovelelo vukuavo linga nenu mu lemese kamponia. Nga ka mu tava, nji ka mi mbila mu lutengo lua tuhia. Ka kuesi na umo Njambi uahi a hasa ku mi ovola kuli ange.’ Vunoni va mu kumbuluile nguavo: ‘Muangana, ka tu tondo vukovelelo vukuavo. Njambi yetu a hasa ku tu ovola. Vunoni cipue nga ka tu ovola, kasi ka tu ka lemesa kamponia.’

Nevukaneza ua nienguele cikuma. Ngeci ua lekele vangamba veni ngueni: ‘Suamekenu tuhia mu lutengo linga lu suame ku hiana vintsimbu vitanu na vivali!’ Kaha ua lekele masualale veni ngueni: ‘Kutenu  ava vamala mu va mbile mu tuhia!’ Tuhia tuaco tua hiangukile cikuma, ngeci tua tsihile masualale va suenene ku hiehi. VaHevelu vatatu va uililile mu tuhia. Vunoni omo Nevukaneza ua talele mu kati, ka muene vamala vatatu, ua muene vauana vali na ku endangana mu tuhia. Ua komokele cikuma ngeci ua hulile masualale veni ngueni: ‘Kati vamala vatatu tu na mbilile mu tuhia? Nji li na ku monamo vauana, kaha ua mu ciuana cifua ceni ngue kangelo!’

Nevukaneza ua suenene ku hiehi na tuhia na ku tambakana ngueni: ‘Tuhukenu, enu vangamba va Njambi Mukua ku Hiana viose!’ Vantu vose va komokele omo va muene Sandelake, Mesake na Avende-nengo va tuhuka mu tuhia ca ku hona ku uema. Cikanda cavo, vinkambu viavo, na vuzalo vuavo ka vua uemene kaha ka va nikile muisi.

Nevukaneza ua handekele ngueni: ‘Njambi ua Sandelake, Mesake, na Avende-nengo mukua ngolo. Na tumu kangelo ueni mu ku vovola. Ka kua kele njambi ueka ngeci mua uavo.’

Ngeci mua vaHevelu vatatu, nove ua lihakela kapandi ka ku kakatela kuli Yehova mu nkala visoti vi ku solokela ni?