Kema Nabucodonosor ya kitemiktoya nopa ueyi teteyotl, tlanauatik ma kichijchiuakaj se ueyi teteyotl ika oro. Kiketski ipan tlamayamitl Dura uan kinsentilik nochi itlayakankauaj. Nopaya nojkia itstoyaj Sadrac, Mesac uan Abed Nego. Nopa tlanauatijketl kinnauatik: “Kema inkikakisej nopa trompetas, arpas uan gaitas, ximotlankuaketsakaj iixpa ni teteyotl. Katli amo motlankuaketsas kimajkauasej ipan nopa horno tlen tlauel kitotonijtokej”. ¿Timoiljuia nopa eyij telpokamej motlankuaketsaskiaj iixpa nopa teteyotl? ¿O san Jehová kiueyichiuaskiaj?

Nopa tlanauatijketl tlanauatik ma tlatsotsonakaj uan ma tlapitsakaj. Nochi maseualmej motlankuaketskej uan kiueyichijkej nopa teteyotl. San Sadrac, Mesac uan Abed Nego amo motlankuaketskej. Se keskij tlakamej kinitakej, uan kiiljuitoj Nabucodonosor: “Nopa hebreos amo kiueyichiuaj nopa teteyotl”. Nopa tlanauatijketl tlanauatik ma kinualikakaj uan kiniljuik: “Maske namantsi amo niinmechtlatsakuiltis, tlaj sampa amo inmotlankuaketsasej, niinmechmajkauas ipan horno. Yon se teotsij uelis inmechmanauis”. Inijuantij kinankilijkej: “Amo tijueyichiuasej nopa teteyotl. ToTeotsij uelis techmakixtis tlaj titechmajkauas ipan tlitl. Uan maske amo techmakixtis, tojuantij amo tijueyichiuasej nopa teteyotl”.

Nabucodonosor tlauel kualanki, uan kiniljuik itekipanojkauaj: “¡Chikompa xijyakatilikaj kuauitl nopa horno uan tlauel xijtotonikaj, amo  san kej ipa inkichiuaj!”. Teipa kiniljuik: “Xikinilpikaj ni tlakamej uan xikinmajkauakaj ipan tlitl”. Nopa tlanauatijketl itekipanojkauaj katli kinmajkajkej nopa eyij telpokamej nimantsi mijkej pampa tlauel totonik eltoya nopa horno. Kema Nabucodonosor tlachixki hornoijtik, kinitak itstoyaj nauij maseualmej, amo san eyij. Tlauel momajmatik uan kintlajtlanilik itekipanojkauaj: “¿Amo tikinmajkajkej eyij tlakamej? Nikinita nauij, ¡uan se nesi kej se iluikaejketl!”.

Nabucodonosor monechkauik uan chikauak kiijtok: “¡ToTeotsij itekipanojkauaj, xikisakaj uan xiualakaj nikaj!”. Kema Sadrac, Mesac uan Abed Nego kiskej, nochi tlauel mosentlachilijkej pampa amo tleno kinpanotoya. Amo tlatlak inintlakayo, ininyoyo niyon inintsonkal, uan amo mijyotiyaya tlaj kinechkauijtoyaj poktli.

Nabucodonosor kiijtok: “¡Tlauel Ueyi ininTeotsij Sadrac, Mesac uan Abed Nego! Kititlanki iiluikaejka ma kinmanaui. Amo itstok seyok kej ya”.

Ni eyij telpokamej hebreos mosentlalijtoyaj amo kema kitlauelkauasej Jehová maske kintlaijiyouiltiskiaj. ¿Tijneki tijchiuas kej inijuantij?