Tepitsin satepan ke tekiuaj Nabucodonosor kikochitak ueyi takat tamachijchiuj, tanauatij maj kichijchiuakan ika oro se ueyi tiotsin. Kitalij kampa amo tepeyoj kampa motatokaytiaya Dura uan ompa kinsentilij nochin uejueyi chiuanimej, kampa no pouiaj Sadrac, Mesac uan Abednego. Tekiuaj tanauatij: “Keman nankikakiskej trompetas, arpas uan gaitas, moneki nanmoixpiloskej iixpan tiotsin. Akin amo kichiuas, kikalakiskej tikoijtik”. ¿Tiknemilia ke moixpiloskiaj eyi hebreos iixpan nejon tiotsin? ¿Oso sayoj kiueyichiuaskiaj Jiova?

Ompa, tekiuaj tanauatij maj tatsotsonanij. Nochin moixpilojkej uan kiueyichiujkej tiotsin. Sayoj ke Sadrac, Mesac uan Abednego amo kiueyichiujkej. Seki takamej kinitakej uan kiluijkej tekiuaj: “Nejon eyi hebreos amo kiueyichiujtokej tiotsin tein tikchijchiuak”. Tekiuaj kintatitauij nejin eyi telpochmej uan kiniluij: “Namechkauati oksepa xiyakan uan xikueyichiuakan tiotsin. Komo amo nankichiuaj, namechkalakis tikoijtik. Nion se dios uelis namechmakixtis nomako”. Yejuan kinankilijkej: “Tekiuaj, amo moneki titechkauas maj oksepa tiyakan. ToDios uelis techmakixtis. Uan maski amo, amo tikueyichiuaskej tiotsin”.

Nabucodonosor tel kualanik. Kiniluij itekitikauan: “¡Chikojpaok xitakauantikan tikoijtik!”. Ompa kinnauatij itateuijkauan: “Xikinilpikan nejin takamej uan xikintamotakan tikoijtik”. Kemej tel totonik  katka, tateuianij momikilijkej keman motokijkej. Eyi hebreos uetsitoj itech tit. Sayoj ke, keman tekiuaj naltachiak, kinitak naui takamej nenentoyaj taijtik, amo eyin. Motelmoujtij uan kintajtanij itapaleuijkauan: “¿Amo eyi takamej tikintamotkej itech tit? Nikinita nauin, ¡uan semej tamati kemej se ángel!”.

Nabucodonosor okachiok motokij uan chikauak kijtoj: “¡Xikisakan, nanitekitikauan Dios akin okachi Ueyichiujkej!”. Nochin kimoujkaitakej keman Sadrac, Mesac uan Abednego kiskej uan ke amo teyi kinpanok. Nion ininnakayo nion inintson nion inintilmaj chichinaujka, uan nion no moijnekuia pokti inintech.

Nabucodonosor kijtoj: “¡IDios Sadrac, Mesac uan Abednego tel ueyichiujkej! Kititanik iángel maj kinmakixtiki. Amo onkak okse dios kemej ininDios”.

Eyi hebreos kiixtalijtoyaj nochipa kitakamatiskej Jiova, itech tein yeski ouijkayot. ¿Tikneki nochipa tiktakamatis Jiova kemej yejuan?