Nako e itšego ka morago ga gore Kgoši Nebukadinetsara a lore ka seswantšho sela se segolo, o ile a dira seswantšho se sengwe se segolo kudu sa gauta. O ile a se bea lefelong leo le bitšwago Dura gomme a bitša batho ba maemo ba nageng ya gagwe, go akaretša Shaderaka, Meshaka le Abedinego, gore ba kgobokane ka pele ga sona. Ke moka a botša batho bao ka moka a re: ‘Gateetee ge le ekwa modumo wa diphalafala, diharepa le diletšo tše dingwe tša mmino, le khuname gomme le rapele seswantšho sa ka sa gauta! Mang le mang yo a ka se rapelego seswantšho seo, o tla lahlelwa mollong.’ Na Shaderaka, Meshaka le Abedinego le bona ba be ba tla rapela seswantšho seo, goba na ba be ba tla rapela Jehofa feela?

Kgoši e ile ya laela gore go bapalwe mmino. Batho ka moka ba ile ba khunama gomme ba rapela seswantšho seo, eupša Shaderaka, Meshaka le Abedinego ba se se rapele. Banna ba bangwe ba ile ba ba bona gomme ba ya ba botša kgoši ba re: ‘Go na le Bajuda ba bangwe ba bararo bao ba ganago go rapela seswantšho sa gago.’ Nebukadinetsara a ba bitša gomme a re go bona: ‘Ke le nea sebaka se sengwe sa gore le rapele seswantšho sa ka. Ge le ka se se rapele, ke tlo le lahlela mollong. Ga go na modimo yo a ka kgonago go le phološa.’ Bona ba re: ‘Ga go hlokagale gore o re nee sebaka se sengwe. Modimo wa rena a ka kgona go re phološa. Eupša le ge a ka se re phološe, tseba wena kgoši gore re ka se rapele seswantšho sa gago.’

Nebukadinetsara a galefa kudu, gomme a re go banna ba gagwe: ‘Bešeletšang mollo ka makga a šupago go feta ka matšatši a mangwe!’ Ke moka a botša mašole a gagwe a re: ‘Tlemang banna ba, le ba lahleleng ka mo mollong!’  Mollo woo o be o fiša kudu moo o ilego wa bolaya mašole ao. Baheberu bao ba bararo e lego Shaderaka, Meshaka le Abedinego ba ile ba lahlelwa ka mollong woo. Eupša ge Nebukadinetsara a lebelela ka moo mollong, o ile a bona batho ba bane ba sepelasepela, mola yena a tseba a lahletše batho ba bararo. O ile a tšhoga gomme a botšiša bahlanka ba gagwe a re: ‘Na ga se ra lahlela batho ba bararo ka mo mollong? Nna ke bona batho ba bane, yo mongwe wa bona okare ke morongwa!’

Nebukadinetsara a batamela moo mollong gomme a goeletša a re: ‘Lena bahlanka ba Modimo Yo Godimodimo, etšwang le tle mo!’ Batho ka moka ba ile ba makala ge ba bona Shaderaka, Meshaka le Abedinego ba etšwa moo mollong ba se ba swa. Mebele ya bona, meriri ya bona le diaparo tša bona di be di se tša swa, e bile ba be ba sa nkge mollo.

Nebukadinetsara o ile a re: ‘Modimo wa Shaderaka, Meshaka le Abedinego o phala medimo ka moka. O rometše morongwa wa gagwe gomme a ba phološa. Ga go na modimo yo a swanago le Modimo wa bona.’

Go swana le Shaderaka, Meshaka le Abedinego, na le wena o tla dula o ekwa Jehofa le ge o le kotsing?