Naatʼáanii Nébukadnézzar nayiizyeel yę́ę bikéédóó óola bee eʼelyaago áyiilaa. Honíteel Dúra hoolyéegi yiyiisįʼ áádóó íhólnííh hąąh naazláhígíí wóshdę́ę́ʼ hałníigo díí yiyiisįʼígíí bidáahgi áłah jizlı̨́ı̨́ʼ. Shéídrak, Mííshak dóó Abédniigo daʼjítah. ‘Trumpets, harps, dóó bagpipes dadiistsʼą́ąʼgo, díí sizínígíí bichʼįʼ yaa ádadoohʼnííł,’ níigo haneʼ áyiilaa. ‘Doo bichʼįʼ yaa ájiidzaaígíí éí déédíljah biyiʼ góneʼ ahoʼdiyoolghą́ą́ł,’ ní. Daʼ ákoósh ashiiké Hííbrew danilínígíí dinéshchíín yichʼįʼ yaa ádaadzaa, doodaiiʼ Jiihóvah daatsʼí deidósin?

Dilní diistsʼą́ąʼgo, tʼáá ájíłtso nitsidazdeezgoʼgo eʼelyaii bichʼįʼ nidahojisá. Shéídrak, Mííshek, dóó Abédniigo éí doo ákódaadzaa da. ‘Nilééh ashiiké eʼelyaii íinilaaígíí doo yichʼįʼ nidahałáa da,’ haʼníigo naatʼáanii bił hóóneʼ. Áko Nébukadnézzar háká iʼííłʼaʼgo áháłní: ‘Díí nahadlá tʼááłáhídi bee nihá náá hwiideeshʼaał. Doo ádaahdzaago éí déédíljah biiʼ góneʼ anihidiʼyooltłʼił. Diyin yisdánihidooniłígíí doo łaʼ hólǫ́ǫ da.’ Nébukadnézzar ádabizhdííniid: ‘Doo nihá hwiidííłʼaał da. NihiDiyin yisdánihidoonił. Doo yisdánihíínil da ndi, naatʼáanii nílíinii, díí eʼelyaii doo bichʼįʼ yaa ádadiiʼníił da.’

Nébukadnézzar ayóó átʼéego báhóóchįįd. Bá ndaalʼaʼí ííłní: ‘Biiʼ déédíljah ayóó átʼéego dookʼą́ąłgo ádaahłééh!’ Bisiláo ííłní: ‘Díí diné  bedaʼastłʼǫ́ǫgo déédíljah góneʼ adahołtłʼiid!’ Biiʼ déédíljah ayóó átʼéego bitsʼá honigah, áko siláo kǫʼ bíighah dahidikáhígíí tʼáá ákǫ́ǫ́ daniné. Hííbrew ashiiké éí kǫʼ yiih níídeeʼ. Nébukadnézzar kǫʼ biiʼ jidééʼı̨́ı̨́ʼ ńtʼééʼ diné dı̨́ı̨́ʼ yiltʼéego jiiłtsą́. Níjísdzíidgo bídahólníihii ábijiní: ‘Diné tááʼ neʼ, tʼáásh ákótʼé? Kʼad éí dı̨́ı̨́ʼ áádóó łaʼ diyingo naalʼaʼí nahalin!’

Nébukadnézzar kǫʼ bichʼįʼ hizhdeeyáago, ákóneʼ naazínígíí ábizhdííniid: ‘Wóshdę́ę́ʼ chʼínóhkááh, Diyin Ayóó Átʼéii bá ndaalʼaʼii!’ Shéídrak, Mííshak dóó Abédniigo doo ádaatʼéhígóó chʼékaigo, diné tʼóó bił adahóóyóí. Hakágí, hatsiiʼ dóó haʼééʼ doo dadíílid da. Doo ndi łid dahojílchin da.

Nébukadnézzar ájíní: ‘Shéídrak, Mííshak dóó Abédniigo biDiyin ayóó átʼé. Diyingo naalʼaʼí yiníłʼaʼgo yisdáhóónil. BiDiyin doo łaʼ bináłtʼéhí da.’

Hííbrew ashiiké ádaadzaaígíí átʼéego, niísh ałdóʼ haada hoodzaago Jiihóvah tʼáá bikééʼ sínízı̨́į doo?